Uładalnik OnlyFans pamior u 43 hady
Leanid Radvinski naradziŭsia ŭ 1982 hodzie ŭ Adesie, zatym jaho siamja pierajechała ŭ ZŠA, dzie jon vyras.
Fota: Leo Radvinsky, facebook.com
Uładalnik OnlyFans Leanid Radvinski pamior u 43 hady, paviedamlaje Bloomberg sa spasyłkaj na zajavu kampanii.
«My hłyboka zasmučanyja navinoj pra śmierć Lea Radvinskaha. Lea mirna pajšoŭ z žyćcia paśla doŭhaj baraćby z rakam», — havorycca ŭ zajavie.
Radvinski naradziŭsia ŭ 1982 hodzie ŭ Adesie, zatym jaho siamja pierajechała ŭ ZŠA, dzie jon vyras.
Jon nabyŭ kantrolny pakiet akcyj OnlyFans u 2018 hodzie i pieratvaryŭ płatformu ŭ fienomien, jaki źmianiŭ industryju porna, dazvoliŭšy stvaralnikam niepasredna brać płatu za svoj kantent, piša Bloomberg.
Zasnavanaja ŭ 2016 hodzie brytanskimi baćkam i synam Hajem i Cimam Stokli, kampanija OnlyFans atrymała viadomaść dziakujučy raźmiaščeńniu parnahrafičnych materyjałaŭ, zabaronienych u bolšaści sacyjalnych sietak.
Papularnaść OnlyFans uzrasła padčas pandemii, kali mnohija akciory filmaŭ dla darosłych i rabotniki seks-industryi źviarnulisia da anłajn-krynic dachodu.
Radvinski vioŭ pieramovy ab prodažy 60% akcyj OnlyFans u miežach ździełki, jakaja aceńvała sajt prykładna na 5,5 młrd dalaraŭ.
U 2024 hodzie kampanija paviedamiła pra bolš čym 4,6 młn akaŭntaŭ stvaralnikaŭ kantentu i kala 377 młn padpisčykaŭ, atrymaŭšy vyručku 1,4 młrd dalaraŭ. Radvinski z 2021 hoda atrymaŭ u vyhladzie dyvidendaŭ kala 1,8 młrd dalaraŭ.