Pavieźli ŭ les kapać mahiłu. Pinčuk ź siabrami z reŭnaści ŭ bahažniku vykraŭ mužčynu
Historyja, jakaja pačałasia ź siamiejnaj svarki i ałkaholu, skončyłasia kryminalnaj spravaj ab niezakonnym pazbaŭleńni voli. Sud Pinskaha rajona vynies prysud.
Zdareńnie adbyłosia minułaj vosieńniu. Abvinavačany piŭ śpirtnoje ź siabrami za horadam, kali jamu patelefanavała susiedka pa internacie i paviedamiła, što ŭ pakoi jaho žonki znachodzicca nieviadomy mužčyna. Raźjušany chłopiec razam z tryma znajomymi, siarod jakich byŭ 17‑hadovy padletak, terminova nakiravaŭsia tudy.
Kab vymanić sapiernika, kampanija pajšła na chitraść: padletak pastukaŭ u dźviery i paprasiŭ mužčynu vyjści ŭ kalidor. Tam na jaho nakinulisia astatnija, źbili i siłaj zapichali ŭ bahažnik aŭtamabila.
Padčas napadu złačyncy pahražali vyvieźci jaho ŭ les, kab toj «kapaŭ sabie mahiłu». Mužčyna paśpieŭ patelefanavać u milicyju z bahažnika, ale ŭ jaho chutka adabrali telefon.
Vykradalniki niekalki razoŭ spynialisia pa darozie i praciahvali źbivać i zapałochvać mužčynu, pahražajučy pryviazać jaho da dreva. U rešcie rešt achviaru adpuścili, zapatrabavaŭšy nikomu nie paviedamlać pra heta.
Sud pryznaŭ usich čaćviarych vinavatymi ŭ niezakonnym pazbaŭleńni voli pa č. 1 art. 183 Kryminalnaha kodeksa.
Troje darosłych fihurantaŭ atrymali realnyja terminy — ad 1 hoda da 2 hadoŭ i 6 miesiacaŭ pazbaŭleńnia voli.
Niepaŭnaletni saŭdzielnik asudžany da 1,5 hoda chatniaj chimii.