Małdova na miažy enierhietyčnaha kryzisu z-za ŭdaraŭ Rasii pa Ukrainie — kraina rychtujecca da nadzvyčajnaha stanovišča
Enierhietyčnaja sistema Małdovy apynułasia ŭ krytyčnym stanie paśla načnych abstrełaŭ ukrainskaj infrastruktury. Premjer-ministr krainy Alaksandru Muncianu sklikaŭ terminovaje pasiadžeńnie ŭrada, kab prapanavać parłamientu ŭvieści nadzvyčajnaje stanovišča ŭ enierhietycy.
Prezident Małdovy Maja Sandu nazvała ŭdary pa cyvilnaj infrastruktury vajennym złačynstvam Rasii. Fota: AP Photo / Vadim Ghirda
Načnyja ataki rasijskich dronaŭ i rakiet pryviali da adklučeńnia mahistralnaj linii elektrapieradač Vułkaniešty — Isakča. Heta klučavy enierhietyčny šlach, jaki złučaje Małdovu ź Jeŭropaj praz Rumyniju. Padčas masavanaj ataki rasijanie atakavali hetuju elektraliniju na terytoryi Ukrainy.
Choć ułady zadziejničali čatyry reziervovyja linii złučeńnia, situacyja zastajecca niestabilnaj.
Prezident Małdovy Maja Sandu nazvała ŭdary pa cyvilnaj infrastruktury vajennym złačynstvam Rasii i padkreśliła, što heta napad na biaśpieku ŭsiaho rehijona.
Situacyju ŭskładniaje toje, što kala paškodžanych abjektaŭ ŁEP byli znojdzieny źbityja drony. Z-za hetaha techničnyja bryhady pakul nie mohuć pačać ramont: dostup da sietak abmiežavany da zaviaršeńnia prac pa raźminiravańni.
Pavodle słoŭ premjer-ministra, uviadzieńnie nadzvyčajnaha stanovišča — heta nie panika, a nieabchodny krok dla apieratyŭnaha kiravańnia kryzisam.
«Uviadzieńnie nadzvyčajnaha stanovišča dazvolić nam dziejničać chutčej: mabilizavać dadatkovyja resursy, abaranić krytyčna važnuju infrastrukturu i, pry nieabchodnaści, užyć dadatkovyja miery dla źmiakčeńnia nastupstvaŭ kryzisu», — padsumavaŭ Muncianu.
Urad zaklikaŭ hramadzian racyjanalna raschodavać vadu i elektryčnaść.