Pryšpilenuju ściuardesu vykinuła za 100 m z samalota padčas avijakatastrofy ŭ Ńju-Jorku. Jana vyžyła
47‑hadovaja bortpravadnica avijakampanii Air Canada Sałanž Tramble cudam vyžyła padčas avijakatastrofy ŭ aeraporcie «Ła Huardyja» ŭ Ńju-Jorku. Jaje tak i znajšli pryšpilenaj da kresła. Dačka žančyny kaža, što ŭ jaje maci «byŭ anioł-achoŭnik».
Sałanž Tremble, ściuardesa avijakampanii Air Canada. Fota pradastaŭlena Saraj Lapin
Trahiedyja adbyłasia ŭ niadzielu, 22 sakavika 2026 hoda. Rejs, jaki vykonvała Air Canada, pryziamlaŭsia ŭ Ńju-Jorku, prylacieŭšy z Manreala.
Na borcie znachodzilisia 72 pasažyry i čatyry členy ekipaža. Kali samalot užo kranuŭsia pałasy, adbyłosia niečakanaje: jon na chutkaści sutyknuŭsia z pažarnaj mašynaj.
Aŭdyjazapisy pieramoŭ śviedčać pra chaos u dyśpietčarskaj.
Pažarnaja mašyna jechała na inšy vyklik — u sałonie samalota United Airlines adčuvaŭsia pach haru, i dyśpietčary pieršapačatkova dali joj dazvoł pierasiekčy ŭźlotna-pasadačnuju pałasu, pa jakoj sadziŭsia kanadski rejs.
U apošnija siekundy pierad udaram dyśpietčar pačaŭ adčajna kryčać: «Stoj! Mašyna 1, stoj, stoj, stoj!», adnak było ŭžo pozna.
Udar byŭ kałasalnaj siły. Kabina piłotaŭ była całkam źniščana. Dva piłoty zahinuli na miescy. Bolš za 40 čałaviek atrymali traŭmy roznaj stupieni ciažkaści i byli špitalizavany. Siarod ich — dvoje pažarnych, jakija znachodzilisia ŭ mašynie.
Fota: Spencer Platt / Getty Images
Adnoj z paciarpiełych stała bortpravadnica Sałanž Tramble. Jana vyžyła paśla taho, jak jaje vykinuła z samalota.
U intervju vydańniu TVA News jaje dačka Sara Lapin raspaviała, što maci atrymała šmatlikija pierałomy i była špitalizavanaja. Jaje vykinuła z samalota bolš čym na 100 mietraŭ. Jana taksama paviedamiła, što ŭ momant katastrofy maci siadzieła adrazu za piłotami.
«Heta sapraŭdny cud. U momant udaru jaje kresła vykinuła z samalota bolš čym za 100 mietraŭ. Jaje znajšli, i jana ŭsio jašče była pryšpilenaja, — raspaviała Lapin TVA News.— U jaje byŭ anioł-achoŭnik. Usio mahło być značna horš».