Litoŭski Siejm admoviŭsia zabirać u biełarusaŭ prava hałasavać na miascovych vybarach

24 sakavika litoŭski Siejm adchiliŭ prapanovu apazicyjnych kansiervataraŭ unieści źmieny ŭ Kanstytucyju, jakija zabaranili b hramadzianam Biełarusi i Rasii, jakija pastajanna žyvuć u krainie, hałasavać i bałatavacca na municypalnych vybarach. Za zabaronu prahałasavali 28 deputataŭ, stolki ž vystupili suprać, 14 ustrymalisia, paviedamlaje LRT.

Padčas pasiadžeńnia litoŭskaha Siejma. Zdymak ilustracyjny. Fota: Kay Nietfeld/picture alliance via Getty Images

Adna z aŭtarak inicyjatyvy, kansiervatarka Dala Asanavičucie-Hružaŭskienie, patłumačyła, što prapanova źviazanaja z vajnoj Rasii suprać Ukrainy, jakaja pačałasia ŭ 2022 hodzie. Pavodle jaje słoŭ, Rasija nie tolki viadzie vajennyja dziejańni, ale i imkniecca ŭmiešvacca ŭ vybary, vykarystoŭvajučy svaju dyjasparu.

U toj ža čas pradstaŭnik ahraryjaŭ Valus Ažuołas vykazaŭ ździŭleńnie, što pravyja i libierały, budučy raniej pry ŭładzie, sami zaprašali vysokakvalifikavanych biełarusaŭ na pracu ŭ Litvu, a ciapier, budučy ŭ apazicyi, prapanujuć abmiežavać ich pravy.

Na miascovych vybarach 2023 hoda pastajannymi žycharami Litvy byli 21 650 zamiežnikaŭ, ź ich kala 17 tysiač — hramadzianie krain, jakija nie ŭvachodziać u ES, hałoŭnym čynam Rasii (pryblizna 8,8 tysiačy) i Biełarusi (kala 3 tysiač). Pa stanie na studzień hetaha hoda kolkaść zamiežnikaŭ vyrasła da 24 545, u tym liku amal 19 000 z krain, jakija nie ŭvachodziać u ES; kolkaść rasijan źmienšyłasia da 8 398, biełarusaŭ — vyrasła da 4 tysiač.

Asanavičucie-Hružaŭskienie adznačyła, što mienš za 4 300 zamiežnikaŭ skarystalisia pravam hołasu try hady tamu. Jana padkreśliła, što nacyjanalnaja biaśpieka pavinna być pryjarytetam, a abmiežavańnie pravoŭ nie pavinna być hałoŭnym.

Kansiervatary prapanoŭvali źmianić Kanstytucyju i Vybarčy kodeks, kab prava hołasu i prava być abranym mieli tolki hramadzianie Litvy abo dziaržaŭ, jakija adpaviadajuć kryteryjam jeŭrapiejskaj i transatłantyčnaj intehracyi. Ciapier ža zakon dazvalaje hałasavać i bałatavacca ŭsim pastajannym žycharam adpaviednaha samakiravańnia, uklučajučy zamiežnikaŭ z dazvołam na žycharstva.

Kamientary da artykuła