U Mahilovie buduć sudzić maładuju maci — jana zrabiła ź niemaŭlaci invalida
21‑hadovaja maci ździekavałasia sa svajho dziciaci i daviała jaho da kalectva.
Prakuratura horada Mahilova nakiravała ŭ sud kryminalnuju spravu ŭ dačynieńni da miascovaj žycharki, jakaja sistematyčna ździekavałasia z ułasnaha syna ad jaho naradžeńnia i pakidała jaho ŭ niebiaśpiecy. U vyniku hvałtu ad rodnaj maci zdarovy chłopčyk atrymaŭ invalidnaść i apynuŭsia ŭ śpiecyjalizavanym domie dziciaci.
Historyja stała publičnaj paśla taho, jak susiedzi pačali zaŭvažać niečałaviečyja kryki z kvatery maładoj maci, raspaviadaje STB.
Kryk dziciaci byŭ praniźliva hučnym. Maci taksama kryčała, što małoje nie daje joj spać i jana nie viedaje, što ź im rabić. Jana harłała na jaho: «Čaho ty kryčyš? Čaho ty ravieš? Supakojsia! Zatknisia!»
Susiedka patelefanavała ŭ milicyju.
Na dopycie maładaja maci pryznałasia: jana to kidała niemaŭla, to biła jaho hałavoj ab vuhał, časam pakidała adnaho na łožku biez nahladu — mienavita tamu chłopčyk časta padaŭ.
Spačatku jana navat sama źviartałasia pa miedycynskuju dapamohu, ale pra apošnija surjoznyja traŭmy ŭčastkovamu piedyjatru ničoha nie skazała.
Tolki padčas płanavaha ahladu doktarka zrazumieła — z małym niešta nie tak. Pry pastupleńni ŭ balnicu miedyki źviarnuli ŭvahu na krovapadcioki roznaj stupieni daŭnaści ŭ vobłaści hrudnoj kletki.
Renthien pakazaŭ množnyja pierałomy rebraŭ, taksama atrymanyja ŭ rozny čas.
Za niekalki miesiacaŭ da taho, jak chłopčyk trapiŭ u balnicu, u siamji ŭžo pravodzili sacyjalnaje rasśledavańnie. Mienavita tady ŭ milicyju pastupiŭ zvanok ad susiedki, ale da jaho pastavilisia niesurjozna: pravierku praviali paviarchoŭna i nie paviedamili ŭ adździeł adukacyi.
Z-za hetaj chałatnaści małoje jašče doŭhi čas zastavałasia ŭ niebiaśpiecy.
U maci dzicia zabrali tolki praz try miesiacy. U studzieni biahučaha hoda žančynu pazbavili baćkoŭskich pravoŭ.
«Maci apuskała novanarodžanaje ŭ dziciačuju vannačku dla kupańnia pry tempieratury vady zvyš 38,0 °S, pry kupańni nie zabiaśpiečvała ŭstanoŭku vannački tak, kab jana nie pierakulvałasia, pry pieranosie syna na rukach naležnym čynam jaho nie fiksavała, pieramiaščała dziciačuju kalasku ź dziciom u joj, spuskajučy jaje pa leśvičnym maršy. Žančyna pakidała niemaŭla adno biez nahladu na praciahły čas na łožku, jaki nie byŭ abstalavany achoŭnymi ad padzieńnia borcikami ci inšymi abmiežavańniami. U šerahu vypadkaŭ maci ŭ takija momanty znachodziłasia ŭ stanie ałkaholnaha apjanieńnia», — piša prakuratura.
Atrymanyja traŭmy pryviali da «stojkaha parušeńnia funkcyj arhanizma».
Chłopčyku pastavili časovuju katehoryju «dzicia-invalid». Ciapier jon znachodzicca ŭ śpiecyjalizavanym domie dziciaci.
Pavodle słoŭ vychavalnikaŭ, apietyt u jaho dobry, jak u zdarovaha i mocnaha małoha. Takim jon i naradziŭsia — biez patałahičnych dyjahnazaŭ.
Adnak traŭmy, u tym liku čerapna-mazhavaja, mocna paŭpłyvali na jaho raźvićcio.
Zaraz chłopčyku hod i čatyry miesiacy. Jon umieje tolki siadzieć i poŭzać. U nahach adčuvajecca słabaść: jon nie moža ŭstavać i chadzić. Navat u chadunkach amal nie pierasoŭvajecca.
Infarmacyja pra chłopčyka ŭžo raźmieščana ŭ Respublikanskim banku danych dla ŭsynavicielaŭ.