Piter Džeksan anansavaŭ praciah «Uładara piarścionkaŭ»
Da Mižnarodnaha dnia čytańnia Tołkina Warner Bros. padrychtavała asablivy anons.
Fota: Albert L. Ortega/Getty Images
Režysior «Uładara piarścionkaŭ» Piter Džeksan paviedamiŭ, što razam z «asablivym partnioram» pracuje nad nastupnym filmam pad pracoŭnaj nazvaj «Uładar piarścionkaŭ: Cieni minułaha».
Hetym partnioram akazaŭsia viadučy viačerniaha šou Styvien Kołbier. Kołbier — daŭni fanat Tołkina.
U razmovie z Džeksanam jon raspavioŭ, što siužet jaho filma budzie zasnavany na raździełach «Bractva piarścionka», jakija nie ŭvajšli ŭ ekranizacyju 2001 hoda.
«Vy viedajecie, što značać dla mianie hetyja knihi i vašy filmy. Ale ja pastajanna pieračytvaŭ šeść raździełaŭ, jakija vy tak i nie ekranizavali, i padumaŭ, što heta mahła b być asobnaja historyja, — skazaŭ Kołbier Džeksanu.
U aficyjnym apisańni filma taki sinopsis: «Padziei razhornucca praz čatyrnaccać hadoŭ paśla śmierci Froda, kali Sem, Mery i Pipin adpraviacca ŭ nievialikaje padarožža, kab paŭtaryć častku taho samaha pachodu. U hety čas dačka Sema, Eleanora, vyjavić staruju tajamnicu, jakaja ledź nie pahubiła ŭsich hierojaŭ u minuły raz».
Data pačatku zdymak pakul nieviadomaja.
Kinatryłohija «Uładar piarścionkaŭ» zasnavana na adnajmiennym ramanie Tołkina i składajecca ź filmaŭ «Uładar piarścionkaŭ: Bractva Piarścionka», «Uładar piarścionkaŭ: Dźvie viežy» i «Uładar piarścionkaŭ: Viartańnie karala». Pradziusaram, scenarystam i režysioram tryłohii vystupiŭ Piter Džeksan. Filmy vychodzili ŭ 2001‑2003 hadach.
Ahułam try filmy byli naminavanyja na 30 premij «Oskar», ź jakich atrymali 17 uznaharod, što źjaŭlajecca rekordam dla kinatryłohij. «Viartańnie karala» (najlepšy film, najlepšy režysior, scenar, muzyka i pieśnia) pieramahło va ŭsich katehoryjach, na jakija było naminavana; jaho «Oskar» za najlepšy film mnohimi byŭ uspryniaty jak zasłužanaja ŭznaharoda ŭsioj tryłohii.