Zabirali pašparty i prymušali vadzić aŭtobusy. U Polščy raskryli złačynnuju hrupu, siarod paciarpiełych — biełarusy
Polskaja firma najmała kiroŭcaŭ z-za miažy dla pracy na haradskich aŭtobusach. Ale zatym u zamiežnikaŭ zabirali pašparty, nie addavali častku zarobku i ŭvodzili ŭ zman adnosna miedycynskaj strachoŭki. Siarod paciarpiełych jość i biełarusy, piša Most sa spasyłkaj na Wyborcza.
Ilustracyjnaje fota Marcin Jakowiak / UM Bialystok
Pavodle źviestak prakuratury, prymusovuju pracu vykarystoŭvała firma z Bytama, jakaja absłuhoŭvaje kala 50 aŭtobusnych maršrutaŭ u Vierchniesilezskaj ahłamieracyi: u Katavicach, Hlivicach, Mikałovie, Sasnoŭcy, Tychach, Zabže, Chožuvie i Dambrovie-Hurničej.
Kiroŭcaŭ z Azierbajdžana, Hruzii, Indyi, Ukrainy i Biełarusi prymušali kiravać aŭtobusami i pry hetym uvodzili ŭ zman adnosna praciahłaści i ŭmoŭ pracy, a taksama miedycynskaha absłuhoŭvańnia. Kiroŭcy pracavali pa 300‑350 hadzin u miesiac, a rekordnaja praciahłaść pracy dasiahnuła 450 hadzin u miesiac.
Jak raspaviała vydańniu Wyborcza Katažyna Całuŭ-Jašeŭska z Nacyjanalnaj prakuratury Polščy, u zamiežnych kiroŭcaŭ zabirali pašparty i inšyja dakumienty, nie vypłačvali im zarobak. Z-za hetaha jany nie mahli viarnucca dadomu abo źmianić pracu.
Prakuratura ŭžo ŭstanaviła 15 paciarpiełych, ale dopyty praciahvajucca.
Vierbavali ludziej, vykarystoŭvajučy bazy pamiežnikaŭ
Abvinavačvańni va ŭdziele ŭ arhanizavanaj złačynnaj hrupie, jakaja atrymlivała vyhadu ad handlu ludźmi, a taksama ŭ sadziejničańni nielehalnamu znachodžańniu zamiežnikaŭ na terytoryi Polščy pradjaŭleny siami asobam. Siarod ich akazalisia ŭładalniki firmy supruhi Kšyštaf i Barbara P.
U złačynnaj dziejnaści prymali ŭdzieł dvoje supracoŭnikaŭ Pamiežnaj słužby, adzin ź jakich — ziać Kšyštafa i Barbary P. Pamiežniki, majučy dostup da baz danych, daviedvalisia, chto z zamiežnikaŭ starajecca atrymać dazvoł na pracu ŭ Polščy. Hetyja danyja vykarystoŭvalisia dla viarboŭki kiroŭcaŭ.
Taksama abvinavačanymi pa spravie prachodziać troje hramadzian Hruzii.
Sud pastanaviŭ aryštavać Barbaru P. i jaje ziacia. Astatnija abvinavačanyja znachodziacca na svabodzie pad załoham ad 2 tys. da 50 tysiač złotych (da 12 tysiač jeŭra). Abvinavačanych pamiežnikaŭ adchilili ad słužby.