MAK zabaraniŭ žančynam-transhiendaram vystupać u žanočych spabornictvach

Ciapier prava vystupać u žanočych dyscyplinach na Alimpijskich hulniach i inšych turnirach pad ehidaj MOK majuć tolki bijałahičnyja žančyny. Heta budzie vyznačacca praź śpiecyjalny hienietyčny skryninh.

Transhiendarnaja płyŭčycha Li Tomas paśla zapłyvu na 500 jardaŭ volnym stylem na studenckim čempijanacie ZŠA ŭ 2022 hodzie. Fota: Kathryn Riley/Getty Images

«Prava na ŭdzieł u lubym mierapryjemstvie žanočaj katehoryi na Alimpijskich hulniach ci lubym inšym mierapryjemstvie MAK, uklučajučy indyvidualnyja i kamandnyja vidy sportu, ciapier abmiežavana bijałahičnymi žančynami, jakija vyznačajucca na asnovie adnarazovaha skryninhu hiena SRY», — havorycca ŭ paviedamleńni na sajcie MAK.

Raniej hetaje pytańnie vyklikała sprečki. Krytyki ŭdziełu transhiendarnych spartsmienak śćviardžali, što paśla mužčynskaha pałavoha raźvićcia ŭ transhiendarnych spartsmienak zastajucca fizičnyja pieravahi, jakija nie całkam źnikajuć navat paśla harmanalnaj terapii.

U svaju čarhu, prychilniki dopusku kazali, što zabarona parušaje pravy čałavieka, a harmanalnaja terapija, maŭlaŭ, vyraŭnoŭvaje ŭmovy.

Raniej MOK nie ŭvodziŭ žorstkich pravił i dazvalaŭ mižnarodnym fiederacyjam samim vyrašać hetaje pytańnie. Ale paśla sprečak vakoł alimpijskich spabornictvaŭ 2024 hoda padychod pierahledzieli.

U 2025—2026 hadach kiraŭnictva MOK zrabiła akcent na «abaronie žanočaj katehoryi», i ŭ vyniku byli ŭviedzienyja bolš strohija ahulnyja praviły.

Novyja praviły pačnuć dziejničać z Alimpijady, jakaja projdzie ŭ 2028 hodzie ŭ amierykanskim Łos-Andželesie. Na masavyja abo amatarskija spartyŭnyja spabornictvy jany raspaŭsiudžvacca nie buduć.

Padstavaj dla reformy stali skandały vakoł niekalkich atletak — u pryvatnaści, amierykanskaj płyŭčychi Lii Tomas, jakaja raniej vystupała ŭ mužčynskaj lizie, i novaziełandskaj ciažkaatletki Łoreł Chabard, jakaja źmianiła katehoryju ŭ 35 hadoŭ.

Kamientary da artykuła