U Mahilovie pabudujuć druhi ladovy pałac. Pry im budzie i pieršy ŭ horadzie akvapark
U Mahilovie rychtujucca da maštabnaj budoŭli: u pojmie raki Dniapro źjavicca hihancki šmatfunkcyjanalny spartyŭny kompleks «Ajśbierh». Jon abjadnaje ŭ sabie novuju ladovuju arenu, jakaja pa pamierach pieraŭzydzie isnujučy pałac, i pieršy ŭ horadzie paŭnavartasny akvapark. Kab realizavać hety darahi prajekt, budaŭnikam daviadziecca źmianić łandšaft, a ŭładam — padrezać achoŭnyja zony Mikolskaha manastyra.
Vizualizacyja prajekta šmatfunkcyjanalnaha spartyŭnaha kompleksu «Ajśbierh». Skrynšot videa Biełaruś 4
Raźmiaścić kompleks płanujuć u Leninskim rajonie, pobač ź isnujučaj pryvatnaj zabudovaj pa vulicach Padhornaj, Bietchoviena i Łamanosava i mostam pa vulicy Karalova. Zakazčykam vystupaje Mahiloŭskaje abłasnoje ŭpraŭleńnie kapitalnym budaŭnictvam, a hienieralnym prajekciroŭščykam — instytut «Mahiloŭhramadzianprajekt».
Pad budaŭnictva vydzieleny ŭčastak płoščaj bolš za 6 hiektaraŭ. Siońnia heta volnaja ad zabudovy, ale mocna zabałočanaja terytoryja ŭ pojmie Dniapra, jakaja pieryjadyčna padtaplajecca viasnovymi pavodkami i častkova vykarystoŭvajecca miascovymi žycharami pad aharody.
Vizualizacyja prajekta šmatfunkcyjanalnaha spartyŭnaha kompleksu «Ajśbierh». Skrynšot videa Biełaruś 4
Vizualizacyja prajekta šmatfunkcyjanalnaha spartyŭnaha kompleksu «Ajśbierh». Skrynšot videa Biełaruś 4
Kab pasadzić na hety składany hrunt masiŭnyja budynki, prajekciroŭščykam daviadziecca litaralna źmianić łandšaft. Uzrovień ziamli na ŭsim učastku štučna padnimuć amal na dva mietry, stvaryŭšy mahutny nasyp ź bietonnym umacavańniem adchonaŭ.
Na budaŭnictva kompleksu płanujuć vydzielić z abłasnoha biudžetu sumu, jakaja aryjencirovačna pieravyšaje 335 miljonaŭ rubloŭ (kala 105 miljonaŭ dalaraŭ). Ź jakich amal 123 miljony pojduć na ŭźviadzieńnie ladovaj areny, a 205 miljonaŭ rubloŭ — na akvapark.
Druhaja ladovaja arena
Asnoŭnuju častku kompleksu budzie składać ladovaja arena maksimalnaj umiaščalnaściu da 5300 hledačoŭ. Heta budzie trochpaviarchovy manumientalny budynak.
Vizualizacyja prajekta šmatfunkcyjanalnaha spartyŭnaha kompleksu «Ajśbierh». Skrynšot videa Biełaruś 4
Fasady vykanajuć z sučasnych sendvič-panelaŭ z dekaratyŭnym azdableńniem. Architektura kompleksu ahułam małavyraznaja i nahadvaje chutčej architekturu pramysłovaha ci składskoha zbudavańnia, jakoje pasprabavali prycharošyć chvalepadobnaj pałasoj, vykananaj z rombapadobnych mietaličnych panelaŭ (u tym liku trochmiernych) u modnym niekalki hadoŭ tamu spałučeńni miatnaha i čornaha koleru.
Arena šmatfunkcyjanalnaja: jana raźličana nie tolki na chakiej (praduhledžany raździavałki adrazu dla 16 kamand), ale i na fihurnaje katańnie, šort-trek, kiorlinh i masavyja katańni.
Fasady šmatfunkcyjanalnaha spartyŭnaha kompleksu «Ajśbierh». Skrynšot videa Biełaruś 4
Vizualizacyja prajekta šmatfunkcyjanalnaha spartyŭnaha kompleksu «Ajśbierh». Na piarednim płanie parkinh, na druhim — ladovaja arena z akvaparkam. Skrynšot videa Biełaruś 4
Heta ŭžo druhi ladovy pałac u Mahilovie. Pieršy byŭ adkryty ŭ 2000 hodzie na inšym bierazie Dniapra i źjaŭlajecca chatniaj placoŭkaj CHK «Mahiloŭ». Jaho ŭmiaščalnaść bolš ścipłaja: stary pałac raźličany na ŭsiaho 3 048 hledačoŭ, a ŭ kancertnym varyjancie ŭmiaščalnaść pavialičvajecca da 4 000 čałaviek.
Na pieršym paviersie novaj ladovaj areny raźmieściacca punkty prakatu i zatočki kańkoŭ, miedycynski kabiniet, śpiecyjalizavanyja zały dla chareahrafii, a taksama vialiki inžynierna-haspadarčy błok dla absłuhoŭvańnia lodu (ildakambajny, choładacentr).
Druhi pavierch całkam addadzieny pad hladackija trybuny, kafe i administracyjnyja kabiniety. Treci pavierch — heta zona padvyšanaha kamfortu z čatyrma VIP-łožami na 100 čałaviek, pres-centram i dadatkovymi trybunami.
Pieršy akvapark u Mahilovie
Druhim bujnym abjektam u kompleksie stanie akvapark. Heta budzie roznapaviarchovy budynak (ad adnaho da troch pavierchaŭ), zdolny adnačasova pryniać da 1100 naviedvalnikaŭ.
Akramia tradycyjnych basiejnaŭ i vodnych horak u akvazonie na pieršym paviersie, prajektam praduhledžany łaźnieva-termalny kompleks, fud-kort, dziciačy hulniavy centr, SPA i navat aeradynamičnaja truba. Svojeasablivaj «fiškaj» pavinien stać hłybakavodny basiejn dla apuskańniaŭ, jaki raźmieścicca na trecim paviersie.
Ladovuju arenu i akvapark budzie złučać ahulny ŭvachod — vializny vitražny atryum.
Vielizarny parkinh na 1350 mašyna-miescaŭ pry šmatfunkcyjanalnym spartyŭnym kompleksie «Ajśbierh».
Vizualizacyja prajekta parkinha pry šmatfunkcyjanalnym spartyŭnym kompleksie «Ajśbierh». Skrynšot videa Biełaruś 4
Fasady parkinha pry šmatfunkcyjanalnym spartyŭnym kompleksie «Ajśbierh». Skrynšot videa Biełaruś 4
Dla takoj vialikaj kolkaści naviedvalnikaŭ kompleksu zaprajektavany hihancki naziemny parkinh na 1350 mašyna-miescaŭ. U jaho architektury taksama vykarystany matyŭ chvalepadobnych pałos, nabranych na fasadzie z dapamohaj viertykalnych mietaličnych łamielaŭ roznaj daŭžyni.
Da kompleksu padviaduć novuju čatyrochpałosnuju mahistral, jakaja złučyć kompleks z vulicaj Karalova.
Vakoł kompleksu vybrukujuć tratuary kalarovaj plitkaj, prakładuć vieładarožki i vysadziać sotni dreŭ, siarod jakich klony, kaštany i duby, i dekaratyŭnych kustoŭ. U centry płoščy pierad arenaj płanujuć ustalavać mastackuju kampazicyju na pastamiencie.
Histaryčnym pomnikam daviadziecca paciaśnicca
Budaŭnictva maštabnaj transpartnaj arteryi da novaha kompleksu zapatrabavała karekciroŭki isnujučych horadabudaŭničych rehłamientaŭ. Jak źviarnuŭ uvahu telehram-kanał «Spadčyna», novaja čatyrochpałosnaja mahistral u pierśpiektyvie pavinna pierasiekčy raku Dziebra i złučycca z zavułkam Sialanskim.
Prajekt novaj vulicy, jakaja złučyć šmatfunkcyjanalny kompleks z vulicaj Karalova. Fota: z dakumientacyi hramadskaha abmierkavańnia
Hety zavułak prachodzić za Śviata-Mikolskim manastyrom — vybitnym pomnikam architektury baroka XVII stahodździa. Zhodna z prajektam zon achovy, zaćvierdžanym u 2019 hodzie, hetaja terytoryja ŭvachodziła ŭ zonu achovy łandšaftu, dzie była zabaroniena prakładka novych transpartnych kamunikacyj.
Schiema prajekta zon achovy Śviata-Mikolskaha manastyra. Zialonym koleram abaznačana zona achovy łandšaftu, dzie było zabaroniena źmianieńnie reljefu i prakładka novych transpartnych kamunikacyj.
Kab prakłaści praciah vulicy da novaha šmatfunkcyjanalnaha kompleksu, jakaja załazić na achoŭnuju zonu manastyra, daviałosia źmianiać rehłamienty achoŭnych zon.
Adnak dziela realizacyi maštabnaha spartyŭnaha prajekta ŭ sakaviku 2026 hoda Ministerstva kultury ŭniesła źmianieńni ŭ prajekt zon achovy manastyra. Novaja pastanova aficyjna dazvalaje prakładku transpartnych kamunikacyj u zonie achovy łandšaftu mienavita dziela «padaŭžeńnia zav. Sialanskaha ŭ paŭdniova-ŭschodnim napramku z ulikam abarony ad zatapleńnia prylahajučych terytoryj». Takim čynam, jurydyčnaja pieraškoda dla budaŭnictva darohi da novaha spartyŭnaha hihanta była źniata.