Hledačy Teatra lalek sychodziać, nie dahledzieŭšy śpiektakla. Čamu?
Učora ŭ Minsku ŭ čarhovy raz davali śpiektakl «Zapiski junaha doktara» ad Teatra lalek. Pakazvali jaho na scenie Doma aficeraŭ. Kvitki na hety śpiektakl Jaŭhiena Karniaha imhnienna raskuplajucca, tamu, kab bolš ludziej mahli na jaho trapić, pakazy pieranosiać u bolšuju zału.
Fota: Threads
Ale adzin z učorašnich hledačoŭ padzialiŭsia, što mnohija ludzi syšli sa śpiektakla, nie dasiedzieŭšy da kanca.
«Reč nie ŭ samoj pastanoŭcy. Pieršy akt 2.10 ludzi vytrymali (choć možna było paru scen i skaracić), syšli paśla antraktu 40‑60 hledačoŭ, tamu što ŭ zale luty choład i skraźniaki. Kvitki nie kupić na pastanoŭku, ale, kali nastupiŭ doŭhačakany dzień śpiektakla, u chałodnaj zale niemahčyma siadzieć»,
— napisaŭ mužčyna ŭ treds.
«Učora byli na śpiektakli, 5 šerah, realna dubak byŭ, u faje było značna ciaplej, bolšaja častka ludziej u antrakcie pajšła ŭ harderob», — pišuć u kamientarach.
Scena sa śpiektakla «Zapiski junaha doktara». Fota: Teatr lalek
Padobnaja situacyja, kali hledačy mierznuć na śpiektakli, nie ŭpieršyniu. Tak, uzimku padčas pakazu ŭ Domie prafsajuzaŭ ludzi siadzieli ŭ kurtkach. I taksama nie ŭsie zmahli dahladzieć.
«Ja syšła z prafsajuzaŭ mienavita tamu što zamierzła, choć i śpiektakl byŭ dobry. Majo zdaroŭje mnie daražejšaje», — piša adna z hladačak u kamientarach.
Ale niekatoryja zaŭvažajuć, što častka ludziej sychodzić i tamu, što nie acaniła śpiektakl.
«Sychodziać tamu što śpiektakl ciažki, a jon raśpijarany, i iduć usie, kamu nie lanota. Chto nie čytaŭ Bułhakava, chto jaho nie lubić, iduć prosta tamu, što možna pachvalicca — vo, ja dastaŭ kvitki. Abo viaduć akulturvacca svajakoŭ. Taki siadzieŭ pobač z nami na «Chutary». Uvieś śpiektakl u telefonie, jarkaść nie vyklučyŭ, hladzieŭ tam naviny, nadvorje, a jaho žonka navat ahryzałasia, kali paprasili jarkaść źmienšyć».
Błohierka Hanna Bond salidarnaja:
«Z pastanoŭki sychodziać usie vypadkovyja ludzi, što pryjšli z-za chajpu. Ludzi, jakija viedali, pa što iduć, dahledzieli da kanca. Naturalnaje sartavańnie. I tak, hladzieć lepš u kamiernaj zale, ale ŭžo kali zdaryłasia, to hledaču treba vyvučać pytańnie, kudy i navošta jon idzie. Hladzieła «Zapiski» 2 razy, vydatny śpiektakl».
Čytajcie taksama:
Ministr kultury choča ŭ biełaruskich teatrach dres-koda
Novy mastacki kiraŭnik Kupałaŭskaha — rasijanin z pravincyjnych teatraŭ