Studentaŭ z Tadžykistana ŭ Mahiloŭskim univiersitecie papiaredzili pra śmiarotnaje pakarańnie za teraryzm
Studentaŭ z Tadžykistana, jakija navučajucca ŭ BDUT, sabrali na prafiłaktyčny kruhły stoł pad niezvyčajnaj nazvaj «Ekstremizm — hrani razumnaści», zaŭvažyŭ kanał «MAYDAY.TEAM».
Praviała mierapryjemstva vychavalnica internata №2 dziaržaŭnaha ŭniviersiteta technałohij Halina Stalmachova — kuratar studentaŭ z Tadžykistana.
Jana patłumačyła maładzionam, što ŭ Respublicy Biełaruś asoba, pryznanaja vinavataj u ździajśnieńni akta teraryzmu, u zaležnaści ad abstavin złačynstva i ciažkaści nastupstvaŭ, karajecca pazbaŭleńniem voli, pažyćciovym źniavoleńniem abo śmiarotnym pakarańniem.
«Zamiežnyja studenty paznajomilisia z takimi paniaćciami, jak «teraryzm», «ekstremizm»; vidami i napramkami teraryzmu», — paviedamlaje pres-słužba ŭniviersiteta.
Mahiloŭski BDUT z 2019 hoda rychtuje śpiecyjalistaŭ dla kandytarskaj fabryki ŭ Dušanbe, kolkaść studentaŭ składaje kala 20 čałaviek. Pry hetym studentaŭ z Uźbiekistana ŭ razy bolš, adnak jany nie ŭvachodziać u «hrupu ryzyki» ź pieraduziatym staŭleńniem, pišuć mahiloŭskija pravaabaroncy.
Mierapryjemstva «pa prafiłaktycy ekstremizmu i mižnacyjanalnych kanfliktaŭ» u BDUT pa časie supała ź niadaŭnim prysudam, vyniesienym u Rasii 12 sakavika fihurantam kryminalnaj spravy ab terakcie ŭ padmaskoŭnaj kancertnaj zale «Krokus Sici Choł». Adkaznaść za terakt uziała na siabie terarystyčnaja hrupoŭka «Viłajat Charasan», jakaja vierbavała ludziej z tadžykskaj dyjaspary.