Apublikavali prasłuchoŭku telefonnych razmoŭ Łaŭrova i Sijarta
Pierachopy telefonnych razmoŭ ministraŭ zamiežnych spraŭ Rasii i Vienhryi Siarhieja Łaŭrova i Pietera Sijarta paćviardžajuć: Budapiešt nie prosta «abaraniaje svaje intaresy», a pracuje jak pramy ahient Kramla ŭnutry Jeŭrasajuza, źlivajučy kanfidencyjnuju infarmacyju i vykonvajučy asabistyja daručeńni rasijskich aliharchaŭ. Rasśledavańnie vydańnia The Insider sumiesna z Frontstory, VSquare, Delfi Estonia i ICJK vykryła padrabiaznaści zakulisnych pieramoŭ.
«Naš ahulny siabar Ališer»
30 žniŭnia 2024 hoda ŭsiaho praz hadzinu paśla viartańnia ministra zamiežnych spraŭ Vienhryi Pietera Sijarta ŭ Budapiešt z Sankt-Pieciarburha jamu patelefanavaŭ jaho rasijski kaleha Siarhiej Łaŭroŭ. Łaŭroŭ zajaviŭ, što paśla vizitu Sijarta cytavali va ŭsich rasijskich ŚMI.
«Ja štości nie tak skazaŭ?» — spałochana spytaŭ Sijarta.
«Nie, nie, nie. Jany prosta kazali, što vy prahmatyčna zmahajeciesia za intaresy svajoj krainy».
Jak tut ža vyśvietliłasia, adzinaj pryčynaj zvanka Łaŭrova stała prośba: aliharch Ališer Usmanaŭ chacieŭ dabicca vyklučeńnia svajoj siastry Hulbachor Ismaiłavaj z sankcyjnych śpisaŭ ES, i Sijarta paabiacaŭ dapamahčy.
«Pasłuchajcie, ja telefanuju vam pa prośbie Ališera, i jon tolki što paprasiŭ mianie nahadać vam, što vy zajmalisia pytańniem jaho siastry», — pačaŭ Łaŭroŭ.
«A, spadarynia Ismaiłava, — Sijarta tut ža zrazumieŭ, pra što havorka. — Tak, biezumoŭna. Sprava ŭ tym, što razam sa słavakami my padajem u Jeŭrapiejski sajuz prapanovu ab vyklučeńni jaje sa śpisa. My padadzim jaje na nastupnym tydni, i, pakolki pačniecca novy pieryjad pierahladu, hetaje pytańnie budzie ŭklučana ŭ paradak dnia. My zrobim usio mahčymaje, kab vyklučyć jaje sa śpisa».
«Vialiki dziakuj, jamu budzie vielmi pryjemna!» — uzradavaŭsia Łaŭroŭ.
Ismaiłava — adna ź dźviuch siaścior Usmanava. Abiedźvie jany znachodzilisia pad sankcyjami Vialikabrytanii, ZŠA, Ukrainy i Estonii, ale druhoj siastry, Saadat Narzijevaj, udałosia vyklučyć svajo imia sa śpisa ES usiaho za piać miesiacaŭ, da vieraśnia 2022 hoda.
Sijarta nie padmanuŭ Łaŭrova: Vienhryja i Słavakija na pasiadžeńni pa pytańni padaŭžeńnia sankcyj zajavili, što nie pahodziacca na padaŭžeńnie, kali z sankcyjnaha śpisa nie budzie vydaleny šerah asob, siarod jakich była i Hulbachor Ismaiłava.
U vyniku sankcyi ES ź jaje byli źniatyja ŭ sakaviku 2025 hoda (praŭda, Estonija adrazu paśla hetaha ŭklučyła jaje ŭ svoj nacyjanalny śpis sankcyj).
Usmanaŭ byŭ hałoŭnaj, ale nie adzinaj temaj toj razmovy pamiž ministrami.
Abodva krytykavali Žazepa Barela, tahačasnaha Viarchoŭnaha pradstaŭnika ES pa zamiežnych spravach i palitycy biaśpieki, jakoha Łaŭroŭ nazvaŭ svaim «samym vialikim rasčaravańniem», a Sijarta hrebliva acharaktaryzavaŭ jak «jeŭrapiejskaha Bajdena».
Vienhierski Kim Fiłbi
Hetaja razmova — tolki adzin z prykładaŭ sieryi telefonnych zvankoŭ, u jakich kiraŭnik vienhierskaha MZS akazvaje rasijskamu kalehu ŭsialakija pasłuhi.
Akramia vykanańnia kankretnych pastaŭlenych pierad im zadač, Sijarta rehularna infarmavaŭ Łaŭrova pra detali kanfidencyjnych pieramoŭ jeŭrapiejskich dypłamataŭ.
Naprykład, u toj ža telefonnaj razmovie 30 žniŭnia 2024 hoda adrazu paśla abmierkavańnia pytańnia ab vyklučeńni Ismaiłavaj sa śpisa Sijarta raskryŭ padrabiaznaści pasiadžeńnia Rady pa zamiežnych spravach ES, u jakim jon udzielničaŭ napiaredadni.
«I heta było varjactvam, viedajecie, kali Łandśbierhis skazaŭ, što my pastaŭlajem pa 12% kožnaj rakiety i snarada», — skazaŭ Sijarta Łaŭrovu, majučy na ŭvazie tahačasnaha ministra zamiežnych spraŭ Litvy Habryelusa Łandśbierhisa, jaki śćviardžaŭ, što Rasija častkova finansuje svaju vajnu za košt prybytku ad prodažu hazu i nafty jeŭrapiejskim pakupnikam, takim jak Vienhryja i Słavakija. I praciahnuŭ: «Ja skazaŭ: siabra moj, ty nie maješ racyi, tamu što jeŭrapiejcy ŭnosiać značna bolšy ŭkład… Haz i naftu z Rasii kuplajuć nie tolki słavaki i my, ale i ŭsie vy, chto kuplaje ich praź Indyju i Kazachstan».
Łandśbierhis paćvierdziŭ, što Sijarta cytavaŭ dyjałoh, jaki sapraŭdy adbyŭsia pamiž imi:
«Ja mahu paćvierdzić, što heta realny abmien dumkami padčas adnaho z pasiadžeńniaŭ Rady pa zamiežnych spravach. Vyhladaje na toje, što ŭvieś hety čas u Pucina byŭ i dahetul jość «krot» na ŭsich aficyjnych sustrečach ES i NATA.
Kali my chočam zachavać hetuju praktyku kanfidencyjnaści, było b varta zabaranić Vienhryi ŭdzielničać u takich sustrečach. U kožnym pakaleńni jość svoj Kim Fiłbi».
Varta adznačyć, što i Fiłbi, i Sijarta atrymali najvyšejšuju rasijskuju ŭznaharodu dla zamiežnikaŭ — orden Družby.
Ukaz ab uznaharodžańni Sijarta byŭ padpisany Uładzimiram Pucinym, ale fizična orden uručyŭ Łaŭroŭ 30 śniežnia 2021 hoda.
U inšaj telefonnaj razmovie Sijarta paviedamiŭ namieśniku ministra enierhietyki Rasii Paŭłu Sarokinu, što robić usio mahčymaje, kab zabłakavać najvažniejšy pakiet sankcyj ES, nakiravany suprać rasijskaha «cieniavoha fłotu». Sijarta taksama prapanavaŭ vyklučyć rasijskija banki sa śpisaŭ, jakija ES rychtavaŭ dla ŭviadzieńnia abmiežavańniaŭ.
U razmovie z Sarokinym 30 červienia 2025 hoda Sijarta paskardziŭsia, što ES admoviŭsia pakazać jamu dakumienty pa sankcyjach suprać kampanii 2Rivers (bazujecca ŭ Dubai i handluje rasijskaj naftaj). «Jany kažuć, što nie bačać vidavočnych vienhierskich intaresaŭ, tamu Vienhryja nie moža na zakonnych padstavach patrabavać ich vyklučeńnia sa śpisa», — patłumačyŭ Sijarta paśla taho, jak Sarokin spytaŭ, čamu Budapiešt byŭ adchileny ad pracesu.
Pavodle źviestak ES, kampanija 2Rivers (raniej viadomaja jak Coral Energy) była adnym z klučavych hulcoŭ u prodažy rasijskaj nafty praz ułasny «cieniavy fłot» tankieraŭ i va ŭtojvańni pachodžańnia syraviny ad rasijskaha dziaržaŭnaha hihanta «Rasnafta», jaki znachodzicca pad sankcyjami ZŠA. Zatym 2Rivers pradaje naftu pa canie, vyšejšaj za mižnarodny limit, zabiaśpiečvajučy rasijski VPK žyćciova važnymi dachodami. U śniežni 2024 hoda Vialikabrytanija ŭviała sankcyi suprać 2Rivers i jaje handlovaj sietki.
Paśla paviedamleńnia ab niaŭdačy ŭ pieramovach z kampanijaj 2Rivers Sijarta padzialiŭsia z Sarokinym padrabiaznaściami pra chod pieramoŭ pa 18‑m pakiecie sankcyj ES.
Vienhierski ministr patłumačyŭ, što hałasavańnie pakul nie ŭklučana ŭ paradak dnia z-za adterminoŭki, arhanizavanaj Vienhryjaj i Słavakijaj.
Heta budzie ciahnucca da taho času, pakul ES nie pahodzicca zrabić vyklučeńnie dla hetych krain i dazvolić im praciahvać zakupki rasijskaha hazu i nafty.
Niahledziačy na namahańni Budapiešta, 18‑y pakiet sankcyj byŭ pryniaty 18 lipienia 2025 hoda. Jon nanios udar pa «cieniavym fłocie» Rasii i kampanii 2Rivers, jakuju Sijarta sprabavaŭ abaranić.