U pary patahonskich mar u Minskim zaaparku naradzilisia dvoje dzietak
Hetyja ekzatyčnyja žyvioły prybyli ŭ Biełaruś hod tamu. Paru nazvali mistar i misis Śmit.
U kancy sakavika jany stali baćkami: u ich źjavilisia dvoje čaroŭnych małych — chłopčyk i dziaŭčynka, paviedamili ŭ Minskim zaaparku.
Pakul što dzicianiatam patahonskich mar nie dali imiony. Dla hetaha ŭ zaaparku vyrašyli pravieści konkurs, u jakim mohuć udzielničać usie žadajučyja.
Pažadana, kab imiony pačynalisia na litaru «S» (jak u baćkoŭ) abo byli suhučnyja/źviazanyja sa słovam «Śmit».
Prapanoŭvać svaje varyjanty imionaŭ dla małych hryzunoŭ možna ŭ kamientaryjach pad publikacyjaj Minskaha zaaparka ŭ Instagram. Konkurs pravodzicca da 8 krasavika. Vyniki abvieściać u hetaj ža sacsietcy ŭ storys.
Post užo sabraŭ bolš za 250 kamientaryjaŭ. Siarod prapanavanych varyjantaŭ jość, naprykład, Sania i Sonia Śmit, Simka i Siomka, Suška i Saška, Saŭron i Silvija — vybar budzie niaprosty.