Pad Viciebskam kapali vodapravod, a dastali kamienny kryž Harasima Ihnataviča, jakomu 400 hadoŭ
Zvyčajnyja ziemlanyja pracy miascovych kamunalnikaŭ prynieśli cikavuju znachodku. U nievialikaj vioscy Karoŭka Viciebskaha rajona ź ziamli dastali kamienny kryž, jaki pralažaŭ tam kala čatyroch stahodździaŭ. Zaraz jon budzie zachoŭvacca ŭ Viciebskaj ratušy.
Kamienny kryž ź vioski Karoŭka Viciebskaha rajona. Fota: Viciebski abłasny krajaznaŭčy muziej
Artefakt byŭ vyjaŭleny 30 sakavika 2026 hoda padčas rabot, jakija «Viciebskvadakanał» pravodziŭ u vioscy Karoŭka Zadubrovienskaha sielsavieta, što niepadalok ad Suraža. Natyknuŭšysia na kamienny kryž, pracaŭniki pradpryjemstva źviazalisia z historykami.
Užo na nastupny dzień, 31 sakavika, artefakt dastavili ŭ Viciebski abłasny krajaznaŭčy muziej. Kab razhruzić masiŭnuju kamiennuju hłybu, spatrebiŭsia ceły padjomny kran. Histaryčnuju znachodku aściarožna padniali z kuzava hruzavika i apuścili ŭ pryjamak uvachodu ŭ padziemny pavierch Viciebskaj ratušy, u jakoj raźmiaščajecca muziej.
Transpartavańnie kamiennaha kryža ŭ abłasny muziej. Fota: Viciebski abłasny krajaznaŭčy muziej
Transpartavańnie kamiennaha kryža ŭ abłasny muziej. Fota: Viciebski abłasny krajaznaŭčy muziej
Transpartavańnie kamiennaha kryža ŭ abłasny muziej. Fota: Viciebski abłasny krajaznaŭčy muziej
Na piarednim baku znojdzienaha kryža možna razabrać hruba vydziaŭbanaje imia niejkaha Harasima Ihnataviča — nieviadoma kim byŭ hety čałaviek.
U nižniaj častcy kryža vybita data, zapisanaja tradycyjnymi dla taho pieryjadu kiryličnymi litarami, na što niedvuchsensoŭna ŭkazvaje śpiecyjalny nadradkovy znak — citła. Pieršyja simvały čytajucca davoli ŭpeŭniena: «҂ACH…». U staražytnaj sistemie źličeńnia litara «A» sa znakam tysiač aznačaje 1000, a litara «Ch» adpaviadaje ličbie 600. Nastupny simvał, jaki pakazvaje dziasiatki hadoŭ, nahadvaje albo litaru «Ł» (tryccać), albo «M» (sorak). Apošniuju ž litaru, jakaja adkazvaje za adzinki, ciažka suadnieści sa standartnymi kiryličnymi ličbami. Tym nie mienš, datavańnie XVII stahodździem nie vyklikaje sumnievaŭ.
Kryž byŭ pastaŭleny litaralna za paru dziesiacihodździaŭ ad kryvavaj vajny siaredziny XVII stahodździa, kali rasijskija vojski pieratvaryli ŭschod Biełarusi ŭ pustyniu.