Biełarus stvaryŭ prajekt z aŭtentyčnymi vandroŭkami pa Partuhalii — u čym jaho fiška?
Partuhalija peŭny čas zastavałasia ŭ ciani inšych, bolš mejnstrymnych jeŭrapiejskich krain, kudy ściakalisia turysty z usiaho śvietu. Ale siońnia heta adzin z samych papularnych kirunkaŭ nie tolki dla vandrovak, ale navat dla emihracyi: ciopły klimat kruhły hod, akijan, ježa i pryroda na vybar, a taksama bahataja kultura i haścinnaść samich partuhalcaŭ.
Lisabon. Fota: Alexander Spatari / Getty Images
Kirył Atamančyk adnojčy palubiŭ Partuhaliju hetak ža, jak i mnohija biełarusy, jakija tam byli, — ź pieršaha pohladu. U vyniku źjaviŭsia prajekt My Portugal Moments — aŭtarski, lampavy pravadnik pa Partuhalii ad ludziej, jakija staviacca da jaje jak da druhoj radzimy.
Raspytali Kiryła Atamančyka pra asablivaści hetych turaŭ, čym jany adroźnivajucca ad šmatlikich hajdaŭ u internecie i čamu biełarusam varta pavučycca ŭ partuhalcaŭ.
Kirył Atamančyk, stvaralnik prajekta My Portugal Moments. Fota: asabisty archiŭ
«My pabačyli Partuhaliju ŭpieršyniu niedzie ŭ 2009 hodzie, i tady jana sapraŭdy była jašče vielmi niedaacenienaj, hublałasia ŭ inšych napramkach. A heta kraina ź nievierahodnaj kancentracyjaj historyi, śviatła i ščyraści. Darečy, pa svajoj ščyraści partuhalcy davoli blizkija da biełarusaŭ.
Tut niama štučnaści, jakuju časam sustrenieš u papularnych stalicach Jeŭropy. Plus Partuhalija — heta kraina, jakaja moža prapanavać amal usio, što zachočaš: lasy, hory, plažy, akijan, vyspy, historyju, kuchniu, zabavy. Usio heta zachaplaje ludziej i ciapier Partuhalija ŭžo ŭvachodzić u šmatlikija rejtynhi dla turystaŭ», — raskazvaje Kirył Atamančyk.
Retra-tramvai — lisabonskaja razynačka. Fota: «Naša Niva»
Fota: Westend61 / Getty Images
Spačatku Kirył pakazvaŭ Partuhaliju siabram i blizkim, dapamahaŭ im adkryvać jaje. Pastupova heta pieratvaryłasia ŭ biznes-ideju.
«Z adnadumcami my vyrašyli stvaryć servis, jaki dapamahaje ludziam nie prosta «naviedać» krainu, a pražyć u joj svaje emacyjnyja momanty. Naš prajekt — dla tych, chto choča razumieć, a nie prosta «pabyvać». Heta i hości, jakija pryjazdžajuć u Partuhaliju ŭpieršyniu, i tyja, chto ŭžo byŭ tut, ale choča bolš hłybokaha dośviedu. Tamu naša asnoŭnaja aŭdytoryja — heta najpierš dapytlivyja padarožniki, jakija ceniać kamfort, aŭtentyčnaść i svoj čas».
Tak hatujecca viadomy partuhalski desiert — paštejš. Fota: «Naša Niva»
Kieramičnuju plitku Azuležu na budynkach možna sustreć pa ŭsioj krainie. Fota: «Naša Niva»
Kirył davodzić, što ŭ toj čas, jak Huhł i štučny intelekt dajuć tolki infarmacyju, jany prapanoŭvajuć hłyboki dośvied, poŭnaje zanureńnie ŭ kulturu.
«Štučny intelekt viedaje fakty, a my viedajem kantekst i emocyi. My Portugal Moments — heta nie masavy tur-šop. Heta žyvoje viedańnie kantekstu: čamu heta miesca važnaje, jak jaho adčuvajuć miascovyja, kali tudy lepš iści i ź jakim nastrojem. My stvarajem maršruty praz asabisty dośvied, pamyłki, adkryćci i luboŭ — toje, što niemahčyma skapiravać ałharytmam. Z ulikam taho, što navokał nas usio bolš štučnaści, my imkniemsia da kamunikacyi ź ludźmi, ich emocyjami i pažadańniami».
Atłantyčny akijan. Partuhalija — raj dla siorfieraŭ. Fota: «Naša Niva»
Kab zamović padarožža z kamandaj My Portugal Moments, dastatkova napisać im anłajn. Dalej vam prapanujuć žyvuju razmovu, kab zrazumieć vaš zapyt, i paśla padrychtujuć indyvidualnuju prapanovu. Zajaŭki prymajucca na niekalkich movach — biełaruskaj, ruskaj, anhlijskaj i partuhalskaj.
«My dapamahajem z maršrutam, prahramaj, łahistykaj, kansultacyjami pierad pajezdkaj. Košt zaležyć ad farmatu (indyvidualna, u pary, u hrupie), praciahłaści i napaŭnieńnia. My nie pracujem «pa šabłonie», tamu kožny raz heta asobnaja historyja. Praŭda, ź vizami my nie dapamahajem (heta nie naš profil)».
Kirył kaža, što biełarusam dakładna jość čamu pavučycca ŭ partuhalcaŭ — naprykład, umieńniu atrymlivać asałodu ad momantu.
«Biełarusy vielmi pracavityja i adkaznyja, ale praz roznyja abstaviny nam časam nie chapaje ŭmieńnia prosta sieści na bierazie, vydychnuć i pahladzieć na zachod sonca, nie dumajučy pra płany na nastupny hod. Partuhalija vučyć bierahčy siabie i svoj unutrany spakoj. Canić prostyja rečy, być u kantakcie z akijanam, pryrodaj i ŭłasnymi tradycyjami. Partuhalcy vielmi strymanyja na pieršy pohlad, ale ščyryja, dalikatnyja i hłyboka čałaviečnyja».
Vandroŭki z kamandaj prachodziać u farmacie «slow tours» — kali vandroŭnik nie śpiašajecca i nasałodžvajecca krainaj i vandroŭkaj pavolna.
Mys Roka — samaja zachodniaja kropka Jeŭrapiejskaha kantynienta. Fota: Botond Horváth / Getty Images
Ciapier My Portugal Moments prapanoŭvaje tury pa Lisabonie. U płanach — Portu, Centralnaja Partuhalija, Madejra i Azory.
«Užo amal padrychtavany da zapusku novy rehijon Alharvie. Kali chopić siłaŭ i času, to pad kaniec hoda mahčyma adkryjem jašče i Alentežu», — raskazvaje Kirył.
«Varta adznačyć, što my jašče nie skončyli pracu pa farmavańni ŭsich prapanoŭ u Lisabonie. My imkniemsia abaviazkova pabyvać u kožnaj łakacyi, jakuju prapanoŭvajem. Jak vy razumiejecie, heta zajmaje šmat času. My z adnaho boku imkniomsia da jak maha šyrejšaha «mieniu», ale ź inšaha — farmujem «pierliny», jakija mohuć zacikavić i bolš vuzkuju aŭdytoryju».
Šukajcie roznyja idei, jak adkryć dla siabie Lisabon, na sajcie My Portugal Moments. Albo źviartajciesia da kamandy prajekta naŭprost — i vam dapamohuć zrabić padarožža ŭ Partuhaliju ŭnikalnym. Vy možacie napisać nie tolki praz sajt, ale i ŭ fejsbuku, instahramie, tyktoku ci LinkedIn — tam, dzie vam najbolš zručna.