Što viadoma pra biełaruskaha HRUšnika, jaki pracuje na łatvijskim kirunku?
Łatvijskaja Słužba raźviedki i biaśpieki Ministerstva abarony (MIDD) nazvała imia špijona biełaruskaha HRU, jaki pracuje na łatvijskim kirunku — Siarhiej Baranaŭ. Daviedalisia bolej pra jaho.
Siarhiej Baranaŭ. Fota: Biełpoł, z bazy IS «Pašpart»
Siarhieju Baranavu 42 hady. Jon ź siamji savieckich vajskoŭcaŭ, naradziŭsia ŭ niamieckim Lejpcyhu. Jahonaja maci — vajskovaja piensijanierka.
Viadoma, što potym mužčyna žyŭ u Viciebsku, dzie skončyŭ miascovy licej. Vyšejšuju adukacyju atrymaŭ u Biełaruskim nacyjanalnym techničnym univiersitecie, jaki skončyŭ u 2005 hodzie.
Siarhiej Baranaŭ. Fota: Belpol, z bazy IS «Pašpart»
Pa źviestkach Belpol, paśla ŭniviersiteta Baranaŭ prachodziŭ słužbu ŭ čaści №97030 u Barysavie. Dasłužyŭsia tam da namieśnika načalnika štaba.
Paśla hetaha jon pierajšoŭ na słužbu ŭ vajskovuju čaść №51886, jakaja ciapier maje numar 11709. Pra jaje raskazvaŭ «Bajpoł» u 2021 hodzie. «Heta samaje zakrytaje padraździaleńnie — dziaviataje ŭpraŭleńnie HRU, na bazie jakoha ŭ 2014 hodzie było stvorana dyviersijnaje śpiecpadraździaleńnie dla pracy za miažoj», — tłumačyŭ Aleh Talerčyk.
Baranaŭ nie raz byvaŭ u Rasii. Naprykład, 12 červienia 2017‑ha i 29 maja 2019‑ha jon znachodziŭsia ŭ Maskvie i rehistravaŭ tam sim-karty. U 2014 hodzie jon naviedvaŭ akupavany Krym i publikavaŭ adtul fota ŭ sacsietkach.
Siarhiej Baranaŭ. Fota: MIDD (palepšanaja jakaść i kantrasnaść)
Zhodna z danymi ab pierasiačeńni miažy, Siarhiej Baranaŭ vyjazdžaŭ u Łatviju minimum dvojčy i abodva razy ciahnikom praź Bihosava. Pieršy raz — z 18 da 24 žniŭnia 2014-ha, druhi — z 18 da 23 lipienia 2015-ha. Meta abiedźviuch pajezdak paznačana jak pryvatnaja.
U śpisach jaho siabroŭ u sacsietkach pałova ludziej z Rasii i tracina z Ukrainy abo akupavanych terytoryj. Minimum troje ź jaho internet-siabroŭ — z Łatvii.
Łatvijskaja Słužba raźviedki i biaśpieki Ministerstva abarony ličyć, što HRU viarbuje ahientaŭ dla zboru raźvieddanych i šukaje inšych ahientaŭ. Pa źviestkach słužby, Siarhiej pracuje mienavita na hetym kirunku.
Što ciapier z Baranavym, nie paviedamlałasia.