Tramp choča pavialičyć vajskovy biudžet ZŠA adrazu na 40%

Administracyja Donalda Trampa prapanavała Kanhresu ZŠA rekordny vajskovy biudžet — kala 1,5 tryljona dalaraŭ na 2027 finansavy hod, paviedamlaje Bloomberg. Heta prykładna na 40% bolš, čym ciapierašnija vydatki na abaronu.

Donald Tramp. Fota: Chip Somodevilla / Getty Images

Pavieličeńnie tłumačycca vajnoj ź Iranam i nieabchodnaściu papoŭnić zapasy ŭzbrajeńnia.

Płanujecca, što asnoŭnaja častka srodkaŭ (bolš za 1,1 tryljona) budzie vydadziena praz standartnuju biudžetnuju praceduru, a jašče kala 350 miljardaŭ — praź śpiecyjalny miechanizm uzhadnieńnia biudžetu.

Kab znajści hrošy, prapanujecca skaracić vydatki na ŭnutranyja prahramy prykładna na 73 miljardy dalaraŭ. U pryvatnaści, mohuć być źmienšanyja finansavańnie achovy zdaroŭja, adukacyi, žyllovych i ekałahičnych prahram. Častku hetych abaviazkaŭ prapanujuć pierakłaści na ŭłady štataŭ.

U toj ža čas pavialičacca vydatki na siłavyja struktury: dadatkovyja srodki płanujuć nakiravać na achovu miežaŭ, departacyi i pracu Ministerstva justycyi.

U Kanhresie takuju inicyjatyvu sustreli naściarožana. Deputaty sumniavajucca jak u samich vydatkach, tak i ŭ tym, što administracyja faktyčna abychodzić ich kantrol nad vajennymi dziejańniami. Jość taksama aściarohi, što taki biudžet značna pavialičyć dziaržaŭny doŭh ZŠA ŭ budučyni.

Kamientary da artykuła