Daradca Naŭsiedy abvierhnuŭ infarmacyju pra stvareńnie «bufiernaj zony» ŭ krainach Bałtyi

Paśla źjaŭleńnia infarmacyi pra toje, što były hienieralny sakratar NATA Jens Stołtenbierh u 2021 hodzie nibyta byŭ hatovy abmierkavać z Rasijaj vyvad sił Aljansu z Uschodniaj Jeŭropy i stvareńnie «bufiernaj zony», jakaja achoplivała b krainy Bałtyi, hałoŭny daradca prezidenta Litvy Dejvidas Matulonis nazvaŭ heta dezynfarmacyjaj, piša Delfi.lt.

Jens Stołtenbierh. Fota: Andreea Alexandru / AP

«Mahu adrazu skazać, što heta čarhovaja dezynfarmacyja (…) Naprykancy 2021 hoda rasijanie sapraŭdy pradstavili hetyja tak zvanyja ŭltymatumy jak NATA, tak i Złučanym Štatam, dzie jany vielmi dakładna vykłali ŭsie patrabavańni. Hetyja ŭltymatumy byli sapraŭdy hrubymi. Adnym ź ich aśpiektaŭ byŭ mienavita vyvad usich sajuznych sił z novych členaŭ NATA, jakija dałučylisia paśla 1997 hoda. Heta aznačała b, što heta zakranuła b 12 dziaržaŭ», — skazaŭ Matulonis radyjostancyi LRT u piatnicu.

«Heta byŭ ultymatum Rasii. Nam jaho pradstavili, my jaho bačyli. Abmierkavańniaŭ z hetaj nahody nie było (…). Jon byŭ kateharyčna adchileny», — padkreśliŭ jon.

Jak paviedamlajecca, łatvijskaje vydańnie Baltic Sentinel piša, što ŭ 2021 hodzie były hienieralny sakratar NATA Jens Stołtenbierh byŭ hatovy abmierkavać z Rasijaj vyvad sił NATA z Uschodniaj Jeŭropy i stvareńnie «bufiernaj zony», jakaja achoplivała b krainy Bałtyi.

U ahladzie miemuaraŭ Stołtenbierha, apublikavanym u vydańni, havorycca, što vosieńniu 2021 hoda tahačasny kiraŭnik NATA sustrakaŭsia ź ministram zamiežnych spraŭ Rasii Siarhiejem Łaŭrovym, kab abmierkavać ideju takoj bufiernaj zony, nie paviedamiŭšy pra heta najbolš uraźlivych sajuźnikaŭ. Choć Polšča i krainy Bałtyi kateharyčna vystupali suprać lubych sastupak Rasii, pavodle Baltic Sentinel, tahačasny hienieralny sakratar NATA pryznaŭ, što ihnaravaŭ ich zaniepakojenaść i byŭ hatovy viarnuć raźmiaščeńnie sił NATA da pazicyj 1997 hoda.

U publikacyi pryvodziacca karotkija razmovy ź nienazvanymi estonskimi dypłamatami, jakija nibyta paćviardžajuć, što Stołtenbierh sprabavaŭ uźniać hetuju ideju za śpinami sajuźnikaŭ pa NATA ŭ rehijonie Bałtyjskaha mora.

Baltic Sentinel śćviardžaje, što Kreml, jaki imknuŭsia da poŭnaha kantrolu nad rehijonam, u vyniku adchiliŭ taki płan. U svaich miemuarach Stołtenbierh piša, što jaho pohlady na adnosiny z Rasijaj sfarmavalisia pad upłyvam jaho baćki, Torvalda, byłoha ministra zamiežnych spraŭ Narviehii, jaki navat padčas Chałodnaj vajny prasoŭvaŭ dyjałoh z Maskvoj.

Kamientary da artykuła