Minsk rychtuje novyja zony dla adpačynku: što źjavicca ŭ kožnym rajonie stalicy
U 2026 hodzie va ŭsich administracyjnych rajonach stalicy adkryjucca novyja łakacyi — ad «Parka miedycyny» i inkluziŭnych placovak da ekaściežki ŭ bałocistaj nizinie i instalacyi ź viertalotam — hladzicie, dzie mienavita minčanie zmohuć bavić volny čas u hetym siezonie.
Jakija novyja łakacyi abstalujuć u hetym hodzie, pišuć «Minsk-Naviny».
Zavodski
Tut płanujuć abstalavać łakacyju ŭ rajonie vuł. Vaniejeva i Kašavoha. Kancepcyja praduhledžvaje stvareńnie piešachodnych darožak, spartyŭnych placovak, ustanoŭku małych architekturnych formaŭ.
Miarkujecca taksama praciah zony adpačynku «Žara» na bierazie Čyžoŭskaha vadaschovišča ŭ bok chrama. Tut chočuć abstalavać dziciačuju placoŭku, pastavić dekaratyŭnyja fihury ptušak, ziemnavodnych i ryb, a taksama draŭlanyja skulptury źviaroŭ i małyja architekturnyja formy.
Leninski
Novyja zony adpačynku ŭstalujuć u Łošycy. Pieršaja ź ich budzie znachodzicca ŭ miežach vuł. Čyžeŭskich i Ihumienskaha trakta. Azielanialniki prapanujuć dać joj nazvu «Usio pačynajecca ź lubovi».
Inicyjatyva ab dobraŭparadkavańni hetaj łakacyi zychodziła ad miascovych žycharoŭ. Užo prakładzieny piešachodnyja darožki. Ustalavany hałoŭnyja art-abjekty ŭ vyhladzie abjomnaha kavanaha serca i «łaŭki kachańnia», a ŭ prahułačnaj zonie — łaŭki z urnami i šaścihrannaja apora ź piaćciu padviesnymi arelami.
Druhaja zona adpačynku zapłanavana ŭ rajonie vuł. V. Turava, pobač ź mikrarajonami Łošyca-5 i Łošyca-10, jakija budujucca. Jana atrymała nazvu «Lubimyja kazki» i raźmieścicca nasuprać 18‑j haradskoj dziciačaj palikliniki. Jaje abstalujuć z ulikam intaresaŭ i patreb dziaciej, u pryvatnaści pastaviać skulptury kazačnych piersanažaŭ z dreva, mietału, kamienia.
Maskoŭski
U hetym hodzie płanujuć pačać 2‑iu čarhu budaŭnictva «Sada vieršaŭ» u rajonie vuł. Ł. Sapiehi. Jaho dapoŭniać častkaj, pryśviečanaj paezii, i pavialičać kolkaść hulniavych miescaŭ dla dziaciej. A taksama zrobiać dziciačuju placoŭku ź inkluziŭnym abstalavańniem, źjaviacca zona piknikoŭ i łakacyja dla nazirańnia za ptuškami.
Jašče adna placoŭka raźmieścicca ŭ paŭdniova-zachodniaj častcy rajona. Heta budzie «Sad fotazdymkaŭ» z małymi architekturnymi formami, vieładarožkaj i viełaparkoŭkaj, fotazonami.
U pierśpiektyvie ŭ Maskoŭskim dobraŭparadkujuć zialonuju zonu ŭ rajonie vuł. Ja. Bryla i Astrožskich, Rafijeva i Hromava, a taksama praśpiekta Dziaržynskaha i vuł. A. Hiedrojca.
Kastryčnicki
Cikavaja zona adpačynku źjavicca kala doma № 3a na vuł. Aeradromnaj. U adpaviednaści z hienpłanam horada ŭzvodzić tut ničoha nie płanujuć, a pad ziamloj kamunikacyi nie prachodziać. Ahulnaja płošča ŭčastka składaje kala 0,4 ha. Tut zrobiać darožki z ustanoŭkaj urnaŭ i łavak, abstalavańnie novych varkaŭt– i dziciačaj placovak. Vysadziać kvietki i maładyja drevy.
Hałoŭnaj asablivaściu stanie instalacyja sapraŭdnaha savieckaha šmatmetavaha viertalota Mi-2, vytvorčaść jakoha zaviaršyłasia ŭ 1990-ch, a taksama inšaj techniki.
Akramia taho, novuju łakacyju płanujuć abstalavać uzdoŭž bierahavoj linii Łošyckaha vadaschovišča — ad vuł. Bresckaj u napramku vuł. Kazinca.
Partyzanski
Praciahniecca dobraŭparadkavańnie terytoryi ŭzdoŭž Ślapianskaj vodnaj sistemy ŭ rajonie Haradskoj kliničnaj balnicy № 6 i 14‑j palikliniki. Tam raźmieścicca «Park miedycyny».
U dalejšym miarkujecca abstalavać łakacyju dla siamiejnaha adpačynku ŭ rajonie vuł. Staletava.
Pieršamajski
Tut źjaviacca Moładzievy skvier i ekaściežka «Lasnaja». Apošniuju płanujuć abstalavać u lesaparku «Zialony Łuh». Pastaviać infarmacyjnyja stendy, arhanizujuć maršrut dla skandynaŭskaj chady i ptušynuju stałovuju.
Akramia taho, praduhledžany varkaŭt-placoŭka, spartyŭny haradok i placoŭka dla zaniatkaŭ fizkulturaj na adkrytym pavietry. Heta źviazana z tym, što niepadalok ad ekaściežki znachodziacca niekalki ŭstanoŭ adukacyi.
Saviecki
Adna z zon adpačynku budzie pryśviečana siamiejnym kaštoŭnaściam. U pryvatnaści, miarkujecca abstalavać miesca, dzie maładyja ludzi zmohuć rabić prapanovu šlubu. Akramia taho, adnym ź lejtmatyvaŭ stanie tematyka šmatdzietnaści. Pieršapačatkovaja nazva — «Šlach da ščaścia».
Jašče adnu łakacyju miarkujuć abstalavać u nievialikim skviery na vuł. Kujbyšava — spartyŭnuju i dziciačuju placoŭki, a taksama ptušynuju stałovuju.
Frunzienski
Tut źjaviacca dźvie zony adpačynku. Pieršaja zapracuje ŭ rajonie skryžavańnia vuł. M. Łyńkova i P. Hlebki. Druhaja — u skviery na vuł. Brykieta, dzie punktam pryciahnieńnia haradžan stała sažałka.
Bližejšaja terytoryja apošnim časam aktyŭna zabudoŭvajecca šmatpaviarchovymi damami. Akramia taho, u pierśpiektyvie ŭ Frunzienskim miarkujuć stvaryć «Sad muzyčnych instrumientaŭ».
Centralny
Novyja łakacyi raźmieściacca ŭ paŭnočna-zachodniaj častcy kala raki Śvisłač. Jany buduć pradstaŭleny ŭ farmacie ekaściežak. Adnu ź ich miarkujuć abstalavać u rajonie parka Narodnaha adzinstva. Druhuju — u rajonie MKAD i vadaschovišča Drazdy, kala park-atela.
Ekaściežka «Partał u śviet bałota» praciahniecca na 500 m. Jana raźmieścicca ŭ bałocistaj nizinie, u asnoŭnym pakrytaj liścievym lesam. Tut raznastajnyja fłora i faŭna. Na hetaj terytoryi pieryjadyčna pasialajucca babry, paŭsiudna sustrakajucca šmatlikija hryzuny, vožyki i zajcy. Ź ziemnavodnych i reptylij — zvyčajnyja vužy, jaščarki, žaby, šeryja rapuchi. Rehularna možna sustreć bolš za paŭsotni vidaŭ ptušak, mnohija ź jakich hniazdujucca.