Ščypač ź Mioraŭ ciahaŭ u susiedziaŭ mabilniki, ale padniaŭ staŭki i pajechaŭ vajavać za Rasiju. I davajavaŭsia
Dryhučy — malaŭničaja vioska ŭ Miorskim rajonie, na bierazie Dźviny. Miascovyja žychary niamała ździvilisia, daviedaŭšysia pra los svajho ziemlaka Uładzimira Paciajonka, jaki im dobra dapiakaŭ.
Uładzimir Paciajonak, fota z sacsietak
Uładzimir Paciajonak naradziŭsia ŭ 1994 hodzie. Tak-siak skončyŭ sielskuju škołu i chutka pryvučyŭ adnaviaskoŭcaŭ chavać kaštoŭnyja rečy.
Stanam na 2021 hod, pavodle danych bazy Belpol, byŭ trojčy sudzimy. Spakušaŭsia navat drabiazoj: napačatku viasny 2014‑ha pryjšoŭ u viaskovuju kramu i nachabna, na vačach u pradaŭca, adkryta skraŭ dźvie plaški harełki.
U tym ža hodzie, budučy ŭ haściach u susiedniaj vioscy, ściahnuŭ u haspadaroŭ mabilnik canoj 500 tysiač niedenaminavanych rubloŭ. Tyja zaŭvažyli i zabrali mabilnik nazad, ale Uładzimir nie zdaŭsia i skraŭ jaho druhi raz. Za što taksama atrymaŭ sudzimaść.
A ŭ žniŭni 2016‑ha Paciajonka, kali jon byŭ prajezdam u Horkach, złavili na tym, što jon prychapiŭ z čužoha ŭčastka adkrutku, pasatyžy, budaŭničuju ruletku i aluminijevuju flahu. Razžyŭsia tavaram na 50 rubloŭ.
Pa Uładzimiry haruje siastra Śviatłana. Z dapamohaj ŠI jana hienieruje ŭ honar zahinułaha brata pieśni i sumiesnyja karcinki, vystaŭlaje ich u svaich sacsietkach
Hrošaj chaciełasia, tamu letam 2025‑ha dziaciuk padpisaŭ kantrakt z rasijskim vojskam. Paśla pary miesiacaŭ vučebki ŭ Rastovie Paciajonku prysvoili vajskovuju śpiecyjalnaść «pamočnik strałka» i nakiravali ŭ Łuhanskuju vobłaść, paśla čaho jaho bolš nichto nie bačyŭ.