Žodziniec palubiŭ čužyja mašyny: nie moh prajści mima, kab nie vyciahnuć mahnitołu ci chacia b nie pakatacca. Kaniec chobi pakłali USU
Alaksandr Burak naradziŭsia ŭ Žodzinie ŭ 1991 hodzie. Ź junactva staŭ cikavicca čužoj majomaściu: šnyryŭ pa leciščach, abkradaŭ mašyny. Kali Rasija adkryła mahčymaść takim ludziam parabavać i majomaść ukraincaŭ, žodziniec dvojčy nie dumaŭ i pajechaŭ na front. Ale nie fartanuła.
Stała viadoma pra jašče adnaho zahinułaha na baku Rasii biełarusa. Heta recydyvist Alaksandr Burak z Žodzina.
Jak viadoma z baz Belpol, kryminalnuju dziejnaść Burak pačaŭ z taho, što pryhledzieŭ u adnym z sadovych tavarystvaŭ kiepska zamkniony dom i pačaŭ tudy łazić, kožny raz vyciahvajučy niešta novaje. Haspadary zaŭvažyli tolki kali źnik dryl. Pa haračych śladach Alaksandra zatrymali.
Potym prajaviłasia svojeasablivaja luboŭ Buraka da techniki — kali jon bačyŭ mašynu biez nahladu, to raźbivaŭ škło i vyciahvaŭ adtul usio, što lažała: mahnitoły, rvanyja kurtki, spalnyja miaški.
Kali ŭ mašynie nie było ŭvohule ničoha, navat mahnitoły, to prosta kataŭsia na joj, a byvała i kataŭ siabroŭ. Za ŭchileńnie ad adbyćcia chimii traplaŭ u vyšuk.
Kali ŭžo trapiŭ u pole zroku milicyi, to staŭ vyjazdžać u inšy rajon pa vosieni, kab «adpracavać» mašyny, jakija pryparkavali hrybniki.
Skončyŭ ža Alaksandr Burak tym, što ŭ 2025 hodzie padpisaŭ kantrakt z rasijskim Minabarony. Trapiŭ u šturmavy atrad, pajšoŭ u svoj pieršy miasny šturm u kastryčniku 2025 i źnik bieź viestak.