U Hiermanii chočuć zabaranić načnoje kašeńnie hazonaŭ, bo heta škodzić vožykam

U Hiermanii prapanujuć zabaranić kasić hazony ŭnačy, kab abaranić vožykaŭ. Mery niamieckich haradoŭ ličać, što hazonakasiłki, asabliva rabatyzavanyja, niebiaśpiečnyja dla hetych žyvioł, piša The Guardian.

Zdymak ilustracyjny. Fota: vecteezy.com

Reč u tym, što vožyki — načnyja istoty, i kali adčuvajuć niebiaśpieku, jany nie ŭciakajuć, a zhortvajucca ŭ kłubok. Z-za hetaha datčyki kasiłak časta nie mohuć ich raspaznać, i žyvioły atrymlivajuć traŭmy ad nažoŭ.

Pradstaŭnica Niamieckaj fiederacyi haradoŭ Kłaŭdyja Kališ adznačyła, što harady ŭsio čaściej stanoviacca miescam žyćcia dla dzikich žyvioł, bo ich naturalnaje asiarodździe skaračajecca. Tamu zabarona na načnoje vykarystańnie kasiłak vyhladaje łahičnaj mieraj abarony.

Pavodle najaŭnych danych, kolkaść vožykaŭ u śviecie za apošniaje dziesiacihodździe skaraciłasia jak minimum na 30%. Z 2024 hoda jany ŭklučanyja ŭ čyrvony śpis jak vid, jakomu pahražaje źniknieńnie.

Akramia kasiłak, niebiaśpieku dla vožykaŭ ujaŭlajuć taksama pryłady dla zboru liścia, asabliva kali žyvioły znachodziacca ŭ śpiačcy. Vialikaja častka vožykaŭ taksama hinie pad kołami aŭtamabilaŭ.

Navukoŭcy z Oksfardskaha ŭniviersiteta razam z dackimi kalehami praviali daśledavańnie i vyśvietlili, što vožyki čujuć ultrahuk. Heta moža dapamahčy adhaniać ich ad daroh z dapamohaj śpiecyjalnych hukaŭ.

Akramia taho, daśledčyki stvaryli madeli vožykaŭ z dapamohaj 3D-druku, kab razam z vytvorcami raspracavać sistemu siertyfikacyi «biaśpiečnych dla vožykaŭ» hazonakasiłak. Pavodle navukoŭcaŭ, traŭmy ad takich pryład stvarajuć vialikuju nahruzku na centry dapamohi žyviołam, a paciarpiełych vožykaŭ časta znachodziać tolki praź niekalki dzion abo tydniaŭ, kali jany ŭžo mocna pakutujuć.

Kamientary da artykuła