Sieviaryniec raskazaŭ, jak administracyja kałonii «vinšavała» jaho z dniom narodzin i dumała padkałoć jak viernika
Z maich pieršych 10 sutak u ŠIZA ŭ Škłovie administracyja zrabiła šou, — napisaŭ Pavieł u svaim fejsbuku.
Pavieł Sieviaryniec na śviatkavańni Dnia Voli ŭ Vilni, 25 sakavika 2026 hoda
Niekalki miesiacaŭ ŠIZA nie davali — bo mianie pryvieźli paśla strašnaj śmierci tam Vitolda Ašurka. Načalstva samo było pryhałomšanaje šumam i abureńniem, peŭny čas nie lutavali. Da taho ž da mianie čas ad času chadziŭ advakat, rodnyja na voli nie maŭčali — i jany śpiarša pabojvalisia bracca rezka.
Kaniečnie, prydumali paru dziasiatkaŭ parušeńniaŭ, zrabili «złośnikam» (atavarka nie na 5 bazavych, a na 2), zabrali spatkańni, pieradačy (u kałonii heta nazyvajecca «obiezžiriť»)… Ale žorny ž kruciacca, mieluć, zahady iduć — pryjšoŭ čas i na mianie.
Nahodu vybrali sumyśla śmiešnuju — nie pavitaŭsia z supracoŭnikam administracyi. Ale było jasna, što heta prosta nahoda.
Na kamisii pakarańnia načalnik začytaŭ z mabiłki dopis «Svabody» pra toje, što ŭ Škłoŭskaj kałonii siadzić palityk Pavieł Sieviaryniec.
— Miešajetie nam rabotať, Sievieriniec. 10 sutok ŠIZO.
Jak i maje być u takich vypadkach, załomvajuć ruki — i vyvodziać u kalidor. A tam, ludcy ž maje, čałaviek piatnaccać u formie — i jak, znajecie, raptoŭnaje vinšavańnie z dniom narodzinaŭ, taki ŭchvalny huł i vopleski, naturalnyja vopleski!
— Ooo! Sievieriniec! Ruki vyšie! Davaj! Pašoooł!!!
«Ruki vyšie» — značyć, załomvajuć tak, što iłbom kranaješ doł. Zavaročvajuć u kabiniet režymki.
— Na poł! Ruki za śpinu! Ležať!!!
Kali tabie dali sutki — usio, supracoŭnikam možna adryvacca «pa poŭnaj».
Lažyš, kaŭtaješ sutarhavymi ŭdychami pył i piasok, serca kałocicca, dychańnia nie chapaje, vakoł pa padłozie brochajuć boty.
— Nohi širie! Ležať, skazaał!
Zajduć, padabjuć nohi, kab šyrej, palubujucca. Pryhažość.
Pajechali, dumaju, chłopiec. Šoŭ mast hoŭ on.
A ŭ ŠIZA zaviali ŭ 20‑iu kamieru (jana skraźniakovaja, nasuprać dvorykaŭ, uzimku samaje toje) — i papiaredzili:
— Dokład budieš diełať, čto v 13‑j kamierie. Poniał?
Heta ž takaja śviadomaść u tavaryšaŭ — Sieviaryniec jon ža typu vierujuščy. Značyt, jeśli 13‑ia kamiera, jemu och kak strašna dałžno być. Ty poniaŭ? Kak čotka prydumana, a?!
I voś mienavita ŭ hety momant mianie adpuściła.