Vystavili na tarhi McLaren, jaki vieźli rasijaninu, ale kanfiskavali praz čatyry hady sudoŭ. Startavy košt uražvaje
U hetaj ekskluziŭnaj mašyny cikavaja i davoli składanaja historyja, jakaja dazvoliła joj zastavacca sa śmiešnym prabieham navat praz šeść hadoŭ paśla vypusku.
Fota: konfiskat.by
Praličylisia, ale dzie?
Hety aŭtamabil vieźli ź Litvy ŭ Biełaruś jašče vosieńniu 2021 hoda, to-bok da vajny i sankcyj, ale kančatkovym pakupnikom byŭ rasijanin. Pry hetym razmytniać mašynu płanavali ŭ Biełarusi.
Sportkar McLaren 720S 2019 hoda vypusku vieźli na łafiecie praź litoŭska-biełaruskuju miažu. Z terytoryi Jeŭrasajuza mašyna vyjechała biez prablem, a voś na biełaruskim baku pačalisia prablemy.
Fota: customs.gov.by
Sprava ŭ tym, što zhodna z pradstaŭlenymi dakumientami, košt dvuchhadovaha sportkara z prabieham kala 300 kiłamietraŭ składaŭ usiaho 17 990 jeŭra. Takaja cana vyklikała arhumientavanyja padazreńni ŭ biełaruskaj mytni. Jany vyznačyli, što realny košt aŭto — 261 579 jeŭra, što ŭ 14,5 razu bolš za zajaŭleny.
Čamu na tarhi vystavili tolki ciapier?
Niahledziačy na toje, što sprava biare pačatak ź listapada 2021 hoda, kančatkovaje rašeńnie kanfiskavać aŭto sud pryniaŭ tolki ŭ lutym 2026 hoda.
Čamu hety praces ciahnuŭsia bolš za čatyry hady — nieviadoma. Ale viadoma, što sportkar uvozili na lhotnika — invalida druhoj hrupy, kab razmytnić aŭto pa ŭkazie №140, to-bok z 50‑pracentnaj źnižkaj.
Fota: konfiskat.by
Pry hetym, jak vyśvietliłasia, realnym pakupnikom amal novaha McLaren byŭ niejki rasijanin, a Biełaruś była patrebna tolki dla taho, kab zekanomić na mycie.
Sprava ŭ tym, što aŭto va ŭzroście da 3 hadoŭ myta ličycca pa staŭcy 48% ad koštu (ale nie mienš za 5,5 jeŭra za kub. sm). Adpaviedna, kali mytu aformić na lhotnika, to staŭka budzie 24% (2,75 jeŭra za kub. sm).
U vyniku Hrodzienskaja mytnia padličyła, što zanižeńnie koštu mahło pryvieści da ŭchileńnia ad vypłaty mytnych płaciažoŭ na sumu bolš za 280 tysiač rubloŭ.
Fota: konfiskat.by
Sačycie za ličbami
Kali brać ukazanuju ŭ supravadžalnych dakumientach sumu 17 990 jeŭra i pry hetym pravieści mytnuju rehistracyju aŭto na biełaruskaha lhotnika, jak toje i płanavałasia, to mytnyja płaciažy skłali b usiaho kala 11 000 jeŭra.
A kali brać košt ad mytni (jaki vyhladaje kudy bolš realistyčnym) i razmytniać aŭto pa poŭnym taryfie, bo realny ŭłaśnik nijakich ilhot nie maje, to zapłacić daviałosia b kala 125 000 jeŭra.
Adnak žadańnie zekanomić bolš za 110 tysiač jeŭra na mycie abiarnułasia čatyrma hadami sudoŭ i kanfiskacyjaj aŭto.
Ciapier užo šaścihadovy sportkar McLaren 720S z prabieham 313 kiłamietraŭ vystavili na prodaž na hrodzienskaj placoŭcy kanfiskatu ad HD «Uschodni».
Fota: konfiskat.by
Startavaja cana aŭtamabila — 1 041 444 rubli, što składaje kala 307 500 jeŭra pa ciapierašnim kursie. U apisańni stan aŭtamabila paznačany, jak zadavalniajučy: drobnyja niaznačnyja drapiny pa kuzavie, akumulatar razradžany. Kluč zapalvańnia jość, ruchavik zapuskajecca.
Pieršyja tarhi musiać adbycca 24 krasavika.