Mer Vilni prapanuje nie padaŭžać dazvoł na žycharstva tym, chto nie vałodaje litoŭskaj movaj na pačatkovym uzroŭni
Pa słovach Vałdasa Bienkunskasa zaraz samy čas vyznačycca ŭ pytańni palityki, kab u budučyni paźbiehnuć surjoznych nastupstvaŭ.
«Siońnia my znachodzimsia ŭ važnaj kropcy: abo biarom siabie ŭ ruki i ŭvodzim jasnyja praviły, abo puskajem usio na samaciok i paŭtarajem pamyłki inšych krain Jeŭropy», — skazaŭ Bienkunskas, piša Delfi.lt.
Mer stalicy Litvy vykazaŭsia za toje, kab u pryjezdžych była matyvacyja vyvučać litoŭskuju, tamu prapanuje źviazać vydaču dazvołu na žycharstva z vałodańniem movaj.
«Prašu ministra ŭnutranych spraŭ inicyjavać patrabavańnie, kab časovy dazvoł na žycharstva padaŭžali tolki tym, chto vałodaje litoŭskaj na ŭzroŭni nie nižej za A2», — skazaŭ mer.
Municypalitet adkryŭ płatformu ŭ internecie. Jana daje mahčymaść mihrantam vyvučać litoŭskuju (za ŭroki jany płaciać sami), horad tolki zabiaśpiečvaje biaspłatnyja miescy dla vykładańnia. Pieršyja vyniki pakazali vialiki intares z boku zamiežnikaŭ — mienš čym za tydzień płatformu naviedali 15 000 karystalnikaŭ, amal 3 000 padpisalisia na abnaŭleńni.
«Za 5 pracoŭnych dzion my atrymali zapyty ad 600 zamiežnikaŭ, jakija chočuć udzielničać u prahramie vykładańnia movy. Ja b skazaŭ, što heta dobry vynik. A praces tolki pačaŭsia», — paradavaŭsia mer.
***
Kali vy žyviacie ŭ Litvie, to možacie padtrymać «Našu Nivu» častkaj vašaha padachodnaha padatku. Heta nie budzie kaštavać vam ani centa.
Vy prosta pieranakirujecie 1,2% ad užo spłačanaha vami padatku pry padačy štohadovaj dekłaracyi.
Voś padrabiaznaja instrukcyja, ja heta zrabić, kali vy pracujecie ŭ Litvie.
Kali vy pracujecie ŭ Polščy — to vam siudy.