U Minsku litaralna za pałovu dnia zdali ŭ arendu kvateru biez azdableńnia. Ale ludzi aburajucca
«Minsk-Śviet» słavicca tym, što ŭ im čaściakom źjaŭlajucca prapanovy pažyć u kvatery z hołymi ścienami. Pra pryčyny zastajecca tolki zdahadvacca.
Niadaŭna małady čałaviek pa imieni Cichan raźmiaściŭ u Threads abjavu ab zdačy kvatery biez azdableńnia. Kaniešnie ŭ «Minsk-Śviecie». Adnapakajoŭcy nanieśli «makijaž»: na bietonnuju padłohu pakłali dyvan, pastavili meblu, u vannaj zmantavali santechniku. Za žyćcio biez vynachodstvaŭ ułaśnik prasiŭ usiaho $150 za miesiac. Niahledziačy na łajalnuju canu, kamientatary ŭsio roŭna aburajucca, piša Onliner.by.
«Minsk-Śviet» słavicca tym, što ŭ im čaściakom źjaŭlajucca prapanovy pažyć u kvatery z čarnavym azdableńniem. Ab pryčynach zastajecca tolki zdahadvacca. Mahčyma, ułaśniki ŭleźli ŭ budoŭlu ŭ momant, kali mietr byŭ šalona tannym, a paśla skačka cen, u tym liku na ramontnyja raboty, finansy skončylisia. Mahčyma, takim čynam jany źbirajuć na ramont. A mahčyma, mietry byli kupleny jak vielmi dalokaja inviestycyja i tamu niama śpieški pryvodzić ich u paradak, ale ž nie prapadać dabru.
Miarkujučy pa fota, Cichan — uładalnik typovaj dla hetaha kvartała małamietražnaj kvatery. U pakoi zroblena razvodka elektryki, u sanvuźle zmantažavana santechnika. Pryviezieny łožak, stoł, kresły. Za ŭtulnaść adkazvajuć dyvany, śviacilnia na pryłožkavaj tumbačcy, čajny kutok na bałkonie
Kvatera zdajecca ŭ arendu za $150 na miesiac plus kamunalnyja pasłuhi — nie tak užo i doraha ŭ našych realijach. Ale kamientataraŭ pad postam takaja prapanova mocna aburyła. Za karotki čas jany napisali bolš za 600 kamientaryjaŭ. U asnoŭnym ludzi spaborničajuć u dościpie.
«Na fota ŭnikalny biełaruski styl chaj-tek. Dakładniej, chaj tak», — ličyć Alena.
«Kali b dyvan byŭ na ścianie, možna było b lohka nakinuć jašče $50», — piša Dźmitryj.
«Zatoje, napeŭna, ź dziećmi i žyviołami možna ci ŭsio ž baiciesia, što ramont sapsujuć?» — žartuje Rehina.
«Dyzajnierski łoft u elitnym rajonie sa śviežym ramontam i ŭsim nieabchodnym za $150? Vy paśpiašalisia. Takoje za $400 zdajuć», — kaža Jaŭhien.
Ale jość i ŭchvalnyja kamientary. Niekatoryja ličać, što na piku cen na arendu žylla ŭ stalicy takaja prapanova — vialikaja ščodraść.
«Sumlennaja, dobraja prapanova dla Minska! Ja zdymaju anałahičnuju kvateru, tolki biez padłohi, duša, pralnaj mašyny, mebli. Karaciej, naohuł hołuju brała. Dla art-majsterni prastorna i niama darahoha ramontu, jaki možna zapeckać svaimi ekśpierymientami. I heta hienijalny varyjant kamfortnaha miesca dla tvorčaj pracy. Tak što reśpiekt tym, chto vystaŭlaje takija varyjanty. Mnohija zanadta vuzka dumajuć i nie ŭmiejuć z čystaha lista rabić cukierku dla siabie», — arhumientuje Julija.
«Dziŭna, što niechta śmiajecca. Mnie zdajecca, što ŭ Minsku ciapier studyi z prystojnym ramontam ad $400 i vyšej. Vydatny varyjant dla studenta, naprykład, jakomu nieabchodna biudžetnaje časovaje žyllo. Umovy bolš-mienš, i hetaha dastatkova. Mnie zdajecca, vy ŭžo ŭ pieršyja hadziny znajšli arandatara», — razvažaje Viktoryja.
Litaralna praz paŭdnia paśla raźmiaščeńnia abjavy ŭłaśnik napisaŭ dadatkovaje paviedamleńnie:
«Kvatera zdadziena! Ale baču, jana vam padabajecca, abjavu prybirać pakul nie budu. Hety dyvan nikoli ŭ žyćci nie čuŭ stolki kamplimientaŭ. Čajny nabor u šoku ad taho, što jaho ličać dajsanam. Ja nie chaču pieraryvać hetu viesiałość».