Na Kamčatcy faktyčna paŭtaryłasia historyja ź pieravała Dziatłava. Tolki hetym razam zahinuli nie ŭsie
Siamiora studentaŭ pajšli ŭ składany łyžny pachod ckarać Avačynski pieravał. U hrupie ŭźnikła sprečka, jany padzialilisia. Samaja spraktykavanaja łyžnica, faktyčnaja lidarka hrupy, vyžyła. Vyžyŭ i jaje chłopiec. Joj 22, jamu 30. Dla astatnich usio skončyłasia drenna.
Fota: shot_shot / Telagram
Hrupa ź dzieviaci turystaŭ vypraviłasia ŭ składany łyžny pachod na Kamčatcy, kab pieraadoleć Avačynski pieravał (vyšynia 900—1200 m), jaki znachodzicca pamiž dvuma dziejnymi vułkanami — Avačynskaj i Karakskaj sopkami. U vyniku ŭ naš čas faktyčna paŭtaryłasia trahičnaja historyja ź pieravała Dziatłava.
Jak paviedamlajuć rasijskija ŚMI, udzielnikam było ad 21 da 31 hoda. Pavodle papiaredniaj infarmacyi, bolšaść ź ich zajmałasia ŭ turystyčnym kłubie imia Jafremava pry Sankt-Pieciarburhskim hornym univiersitecie.
Maršrut u teoryi adnosicca da treciaj katehoryi składanaści: u jaho ŭvachodziać niekalki pieravałaŭ i kańjonaŭ. Adnak rehijon viadomy niepradkazalnaściu nadvorja — zaviruchi i burany tut pačynajucca raptoŭna, i hrupa litaralna za ličanyja chviliny akazvajecca ŭ «biełaj imhle» z nulavoj bačnaściu. Dadatkova situacyju ŭskładniaje ciažki reljef — na šlachu treba pierasiakać hornyja reki.
Turysty zarehistravali maršrut, i 28 sakavika vyjšli z pasiołka Pinačava (nacisk na pieršy skład). Padčas pachodu pamiž udzielnikami ŭźnik surjozny kanflikt. Kiraŭnica hrupy — 22‑hadovaja studentka Lizavieta Je. — prapanavała pamianiać pieršapačatkova ŭzhodnieny maršrut na karaciejšy i biaśpiečniejšy. Adnak astatnija nastojvali na tym, kab iści pa zapłanavanym, bolš doŭhim i niebiaśpiečnym šlachu. U vyniku jana zdoleła pierakanać tolki svajho partniora — 30‑hadovaha kandydata ŭ majstry sportu pa spartyŭnym turyźmie Jahora R.
Pałatki, turystyčnaja harełka i spadarožnikavyja telefony byli tolki ŭ kiraŭnicy hrupy i jaje spadarožnika, što istotna ŭskładniła stanovišča astatnich.
6 krasavika hrupa ź siami čałaviek jašče vychodziła na suviaź i paviedamlała, što ŭsio ŭ paradku. Na nastupny dzień ich bačyli kiroŭcy śniehachodaŭ kala vadaspadu na race Šumnaj — turysty płanavali za adzin dzień dajści da Avačynskaha pieravała. Apošni raz jany pavinny byli vyjści na suviaź 10 krasavika, ale nijakich paviedamleńniaŭ nie pastupiła. Paśla hetaha supracoŭniki MNS raspačali pošukavuju apieracyju.
Fiodar Rusaŭ (źleva) i Siarhiej Vasileŭski. Fota: shot_shot / Telagram
U vyniku Lizavieta i Jahor ščaśliva viarnulisia, a astatnija ŭdzielniki hrupy trapili ŭ mocnuju purhu. Dvoje ź ich — 22‑hadovy Fiodar Rusaŭ i 24‑hadovy Siarhiej Vasileŭski — zahinuli. Jašče piaciora byli znojdzienyja z surjoznymi abmaražeńniami i ciapier znachodziacca ŭ balnicy, dzie im akazvajuć nieabchodnuju dapamohu.