Kitaj źbirajecca patajemna pastavić u Iran sistemy SPA

Pavodle infarmacyi amierykanskaj raźviedki, Kitaj moža ŭ najbližejšyja tydni patajemna pastavić Iranu novyja sistemy supraćpavietranaj abarony, u tym liku pieranosnyja zienitna-rakietnyja kompleksy, piša CNN.

Zdymak ilustracyjny. Fota: China Photos/Getty Images

Hetyja srodki ličacca niebiaśpiečnymi najpierš dla nizkapalotnaj avijacyi. Adznačajecca, što padčas niadaŭniaj vajny ZŠA i Izraila suprać Irana padobnyja sistemy ŭžo ŭjaŭlali surjoznuju pahrozu. Jość mierkavańnie, što Iran moža vykarystać ich u vypadku parušeńnia režymu spynieńnia ahniu.

Pry hetym Kitaj, jak miarkujecca, moža padavać takija pastaŭki jak vyklučna abarončyja — maŭlaŭ, jany nie pryznačanyja dla nastupalnych dziejańniaŭ. Taksama paviedamlajecca, što pastaŭki mohuć iści praz trecija krainy, kab schavać ich sapraŭdnaje pachodžańnie.

Raźviedka ZŠA ličyć, što Iran vykarystoŭvaje pieramirje, kab adnavić zapasy ŭzbrajeńniaŭ pry dapamozie svaich partnioraŭ. Akramia taho, kitajskija kampanii nibyta praciahvajuć pastaŭlać Iranu technałohii padvojenaha pryznačeńnia, abychodziačy sankcyi.

U toj ža čas aficyjny Piekin abviarhaje hetyja śćviardžeńni. Pradstaŭnik kitajskaha pasolstva ŭ Vašynhtonie zajaviŭ, što Kitaj nie pastaŭlaje zbroju nivodnamu boku kanfliktu, i nazvaŭ danyja raźviedki niedakładnymi.

Paralelna paviedamlajecca, što Kitaj moh adyhrać važnuju rolu ŭ dasiahnieńni pieramirja pamiž ZŠA i Iranam, bo zacikaŭleny ŭ supracoŭnictvie z Tehieranam, u tym liku ŭ śfiery enierhietyki.

Kamientary da artykuła