U Bundeślizie žančyna ŭpieršyniu stała hałoŭnym trenieram mužčynskaj kamandy
Bierlinski «Unijon» upieršyniu pryznačyŭ žančynu hałoŭnym trenieram: paśla zvalnieńnia Štefiena Baŭmharta kamandu ŭznačalić 34‑hadovaja Mary-Łuiza Eta. Takim čynam, jana stała pieršaj žančynaj-hałoŭnym trenieram u Bundeślizie, piša Bild.
Mary-Łuiza Eta. Fota: sacsietki kłuba
Da hetaha Mary-Łuiza Eta treniravała junackuju kamandu U19 i pavinna była ŭznačalić žanočuju kamandu ź leta. Adnak ciapier joj treba budzie vyratavać «Unijon» ad vyletu z Bundeślihi.
«Ja rada, što kłub davieryŭ mnie hetuju adkaznuju zadaču. Mocnym bokam «Unijona» zaŭsiody było i zastajecca toje, što ŭ takich situacyjach my abjadnoŭvajem usie svaje siły», — kaža trenierka.
Sama Eta, jakaja naradziłasia ŭ Drezdenie, — paśpiachovaja futbalistka: jana hulała ŭ apornaj zonie, u pryvatnaści za «Turbine Patsdam», stanaviłasia čempijonkaj Hiermanii i vyjhravała Lihu čempijonaŭ. Jaje klikali va ŭsie moładzievyja zbornyja ad U15 da U23. U «Unijonie» jana ŭžo pracavała pamočnikam treniera ŭ 2023 hodzie. Jaje muž Bieńjamin Eta — były futbalist i taksama trenier: niadaŭna jaho zvolnili z «Tenis Barusija Bierlin», i ciapier jon treniruje žanočuju kamandu «RB Lejpcyh».