Pravakataru Maćvieju Bialaju, jaki viarnuŭsia ŭ Biełaruś, pryznačyli prymusovaje lačeńnie
Mužčynu zatrymali ŭ miežach kryminalnaj spravy.
Hod tamu prapahandysty śćviardžali, što aktyvist Maćviej Bialaj byŭ departavany ź Litvy ŭ Biełaruś, paśla čaho byŭ zatrymany.
Jak stała viadoma pravaabaroncam «Viasny», mužčynu zatrymali ŭ miežach kryminalnaj spravy, ale paśla taho, jak jon sam viarnuŭsia ŭ Biełaruś. Pavodle šerahu palityčnych artykułaŭ jamu pryznačyli prymusovaje lačeńnie.
Pavodle viersii abvinavačvańnia, 3 sakavika 2021 hoda Bialaj nanios udar małatkom pa dźviarach Doma ŭrada, paśla čaho byŭ zatrymany. Praz try miesiacy sud pryznačyŭ jamu prymusovaje psichijatryčnaje lačeńnie. Paźniej mužčyna apynuŭsia ŭ Litvie i śćviardžaŭ, što nibyta zdoleŭ uciačy z ustanovy.
U noč na 20 krasavika 2023 hoda jon zakinuŭ samarobnuju zapalnuju pryładu na terytoryju pasolstva Biełarusi ŭ Vilni.
Jaho aryštavali, paźniej prysudzili 11 miesiacaŭ źniavoleńnia, jakija jon adbyŭ padčas čakańnia suda. Paśla hetaha jon pakinuŭ Litvu i žyŭ u roznych krainach ES, u tym liku sprabavaŭ atrymać prytułak u Hiermanii, ale atrymaŭ admovu.
Da 8 sakavika 2025 hoda Bialaj aktyŭna vioŭ sacyjalnyja sietki, paśla čaho źnik z publičnaj prastory. Nieŭzabavie jahonaje imia źnikła z bazy vyšuku Biełarusi i Rasii. Prapahandysty śćviardžali, što jon byŭ departavany ź Litvy ŭ Biełaruś. Ale, jak stała viadoma pravaabaroncam «Viasny», jon sam pryniaŭ rašeńnie viarnucca ŭ Biełaruś. 10 sakavika 2025 hoda Bialaj byŭ zatrymany ŭ Biełarusi ŭ miežach kryminalnaj spravy, uzbudžanaj suprać jaho jašče ŭ 2023 hodzie, kali jon byŭ u emihracyi.
Vosieńniu 2025 hoda adbyŭsia sud. Jaho abvinavacili pavodle č. 1 art. 342 KK (aktyŭny ŭdzieł u hrupavych dziejańniach, jakija hruba parušajuć hramadski paradak), č. 4 art. 16 art. 341 KK (padbuchtorvańnie da psavańnia majomaści abo apahańvańnia budynkaŭ), č. 1 art. 368 KK (abraza Łukašenki).
U vyniku sud Barysaŭskaha rajona pryznačyŭ jamu prymusovaje lačeńnie ŭ psichijatryčnym stacyjanary z uzmocnienym nahladam.