Błohieru Łapšynu zabaranili ŭjezd u Armieniju. Hetamu mahli paspryjać i biełaruskija ŭłady

Incydent adbyŭsia 5 krasavika ŭ aeraporcie Jerevana. Jak i raniej, błohiera Alaksandra Łapšyna zatrymali na pašpartnym kantroli, ale hetym razam paviedamili, što ŭjezd u krainu dla jaho całkam zakryty i jon pavinien źjechać. Pry hetym nijakich aficyjnych dakumientaŭ z tłumačeńniem pryčyn jamu nie dali, piša «Radyjo Svaboda».

Alaksandr Łapšyn. Fota: fejsbuk

Pierad hetym Łapšyn sprabavaŭ atrymać elektronnuju vizu pa izrailskim pašparcie, ale ŭpieršyniu atrymaŭ admovu. Tamu jon vyrašyŭ palacieć bieź jaje i aformić vizu ŭžo na miescy, ale i tam jamu admovili. U Armienii ŭ jaho zastalisia siabry, a taksama kvatera i asabistyja rečy, bo raniej jon žyŭ tam niekalki hadoŭ.

Aficyjna błohieru patłumačyli zabaronu tym, što jon apublikavaŭ intervju z byłym armianskim vajennapałonnym, jaki raskazvaŭ pra katavańni ŭ azierbajdžanskim pałonie. Na dumku armianskaha boku, takija materyjały mohuć škodzić adnosinam pamiž Armienijaj i Azierbajdžanam. Sam błohier ličyć hetaje tłumačeńnie niełahičnym.

Nieaficyjna ž jamu skazali, što prablema moža być u tym, što jaho ŭžo nieadnarazova zatrymlivali ŭ Armienii pa zapytach Biełarusi, i heta prosta nadakučyła miascovym słužbam. Usiaho takich zatrymańniaŭ było siem.

Prablemy ź biełaruskimi ŭładami ŭ Łapšyna pačalisia jašče ŭ 2016 hodzie, kali jaho zatrymali ŭ Biełarusi i pieradali ŭ Azierbajdžan z-za kryminalnaj spravy za naviedvańnie Nahornaha Karabachu. Tam błohiera asudzili, ale paźniej pamiłavali. Paśla hetaha jon padaŭ skarhu ŭ AAN, i tam pryznali, što jaho pravy byli parušanyja.

U nastupnyja hady Biełaruś praciahvała abvinavačvać Łapšyna, i ŭ 2024 hodzie jaho ŭpieršyniu zatrymali ŭ Armienii pa biełaruskim zapycie, ale nie vydali. Paźniej takija zatrymańni paŭtaralisia. Łapšyn navat źviartaŭsia ŭ armianski sud, jaki pryznaŭ, što abvinavačańni Biełarusi nie adpaviadajuć miascovym zakonam, ale heta nie spyniła zatrymańniaŭ.

Ciapier, paśla poŭnaj zabarony na ŭjezd, błohier kaža, što ŭ jaho amal nie zastałosia jurydyčnych mahčymaściaŭ niešta źmianić. Jon nakiravaŭ zapyt armianskim uładam, kab atrymać aficyjnaje tłumačeńnie, ale pakul adkazu niama.

Kamientary da artykuła