62‑hadovaja biznesvumen i miljanierka Iryna Ciareščanka padzialiłasia historyjaj svajho kachańnia z mužčynam, na 20 hadoŭ małodšym za jaje
Uładalnica viadomaj sietki sałonaŭ pryhažości «Itejra» paznajomiłasia sa svaim abrańnikam dvaccać hadoŭ tamu. Na momant sustrečy joj było 42 hady, a jaje budučamu mužu — usiaho 22.
Iryna Itera z mužam Arturam. Tut i dalej skryn videa: ONT_LIFE / YouTube
Iryna Ciareščanka — dačka i spadkajemca ŭładalnika «Bielita-Viteks» Viktara Ciareščanki (pamior u 2021 hodzie). Jana źjaŭlajecca stvaralnicaj sietki sałonaŭ pryhažości pad nazvaj «Itejra». Pad takim ža psieŭdanimam žančyna vystupaje jak śpiavačka. Jaje muž — biznesmien Artur Fianiuk. Jon raźvivaje deviełapierski biznes.
U efiry prahramy «Jašče nie viečar» na ANT Iryna i Artur raskazali pra svajo znajomstva i žyćcio razam.
«Ja pryjšła na biznes-sustreču, dumki maje byli krychu ŭ inšaj śfiery, i ja absalutna nie pryjšła dla taho, kab znajści muža. U pošuku ja nie była. Tamu, viadoma, nie dumała pra toje, kab razhladać niejki abjekt, jaki mianie cikavić», — zhadała pradprymalnica.
Pa słovach Iryny, jana adrazu acaniła ŭ svaim novym znajomcy nadziejnaść i stabilnaść, adnak znakamitaja iskra pamiž imi praskočyła nie adrazu. Što tyčycca ŭzrostu, to heta pytańnie praciahły čas zastavałasia tajamnicaj dla abaich.
«Na momant znajomstva, viadoma ž, ni ja, ni jon nie viedali, kolki nam hadoŭ. (…) Viadoma ž, kab my viedali naš uzrost, my b nikoli nie pačali kamunikacyju. Ja dakładna tak dumaju, i moj spadarožnik taksama», — havoryć Iryna.
Dla samoha ž maładoha čałavieka znajomstva stała kachańniem ź pieršaha pohladu. Praŭda, ramantyčnyja adnosiny zaviazalisia značna paźniej.
«My byli spačatku partniorami pa biznesie, pamiž nami zaradziŭsia davier, paśla adnoj ździełki pierajšli da inšaj. (…) Dalej ja pačaŭ niejkija znaki ŭvahi vielmi akuratna akazvać. Kvietki niejkija na śviaty, 8 sakavika, dzień naradžeńnia… Paśla apłata prezientacyi, klipaŭ. I potym, kali ŭbačyŭ, što jana taksama na mianie hladzić takim pozirkam — «nu, davaj dalej, nastupny krok» — znaki ŭvahi pajšli bolš vidavočnyja», — uzhadvaje mužčyna.
Pavodle jaho słoŭ, praŭda pra ŭzrost adkryłasia tolki praz paŭtara hoda paśla pačatku stasunkaŭ.
«Krychu byli ździŭlenyja, ale ŭžo pozna. Pačućci ŭžo byli nastolki mocnyja, što heta ŭžo dakładna nie stała pieraškodaj», — tłumačyć jon.
Muž i žonka nie ŭtojvajuć: baćki z abodvuch bakoŭ spačatku byli kateharyčna suprać hetaha sajuza. Situacyju ŭskładniaŭ toj fakt, što maci kachanaha ŭsiaho na dva hady starejšaja za jaho vybrańnicu. Adnak z časam usie kanflikty zastalisia ŭ minułym, i ciapier u siamji panujuć vydatnyja adnosiny.
Siabry i znajomyja Iryny taksama stavilisia da jaje ramana skieptyčna, prahnazujučy, što para razydziecca maksimum praź piać hadoŭ. Ale nasupierak usim prahnozam jany razam užo dvaccać hadoŭ.
Uzrost nie staŭ pieraškodaj i dla maciarynstva: u 46 hadoŭ biznesvumen zaciažaryła. Heta było supolnaje i śviadomaje rašeńnie pary, choć miedyki i byli nastrojeny naściarožana.
«Kali ja pryjšła da doktara ciažarnaj, mnie skazali: «A vy źbirajeciesia zachoŭvać?» — z takimi kruhłymi vačyma. Ja kažu: «Ja nie tolki zachoŭvać, ja budu abierahać usimi mahčymymi sposabami hetuju ciažarnaść». Jany kažuć: «Oj, a my b usio ž taki zrabili abort, vy dobra padumajcie»», — uzhadvaje žančyna.
Siońnia ich dačcy Ryjanie ŭžo 15 hadoŭ. Maci pryznajecca:
«Jana zaŭsiody mianie ŭ dziacinstvie pytałasia: «Mama, a kolki tabie hadoŭ?» Nu ja, śmiejučysia, kazała 18, a jana dumała, što heta sapraŭdy tak. (…) Potym, kali jana vyrasła i stała ŭśviedamlać, jana daviedałasia pra moj uzrost i kaža: «Mama, a što ž takoje, čamu u mianie ŭ siabrovak usie mamy maładyja, a ty rana pamreš». Heta značyć, jaje bolš hetaja tema niepakoiła».
Što tyčycca emacyjnaha fonu ŭ siamji, to žančyna śćviardžaje, što zusim nie adčuvaje reŭnaści da muža. A voś jaje vybrańnik, naadvarot, ličyć heta pačućcio nieadjemnaj častkaj ich suviazi.
«Ja, napeŭna, pa-inšamu i nie zmoh by pakazvać svaje pačućci. Tamu što kali ja kachaju, ja raŭnuju», — padsumoŭvaje mužčyna.