Na trasie ŭ Viciebskaj vobłaści zrobiać masty-tuneli dla dzikich žyvioł

U Viciebskaj vobłaści praciahvajecca maštabnaja rekanstrukcyja aŭtadarohi R46, jakaja złučaje Lepiel i Połack. Padčas budaŭnictva vykarystoŭvajuć jak zvykłyja technałohii, tak i novyja rašeńni, piša BiełTA.

Raboty pačalisia ŭ listapadzie 2024 hoda. Za hety čas užo adkryli kala 30 kiłamietraŭ darohi — ad Połacka da vioski Saročyna. Jašče prykładna taki ž učastak płanujuć zaviaršyć da vosieni, kab całkam abnavić trasu da Lepiela.

Padčas budaŭnictva vykarystoŭvajuć jak zvykłyja technałohii, tak i novyja rašeńni. Naprykład, upieršyniu tut robiać śpiecyjalnyja pierachody dla dzikich žyvioł. Nad darohaj uzvodziać svojeasablivyja masty z tunelami, pad jakimi buduć prachodzić łasi, kazuli i aleni. Uzdoŭž lasnych učastkaŭ staviać tryvałyja aharodžy, kab žyvioły nie vybiahali raptoŭna na darohu, a išli da biaśpiečnych pierachodaŭ.

Prajekt vielmi bujny: na im pracuje kala 70 čałaviek i dziasiatki adzinak techniki. Častka rabočych pryjazdžaje štodnia, inšyja pracujuć vachtavym mietadam.

Asobnaja ŭvaha nadajecca vodaadvodu. Kab vada nie zatrymlivałasia i nie ŭtvarałasia bałotaŭ, praz kožnyja 600—700 mietraŭ staviać śpiecyjalnyja truby roznaha dyjamietra. Staryja materyjały taksama vykarystoŭvajuć paŭtorna — bieton pierapracoŭvajuć i ŭžyvajuć dla ŭmacavańnia ŭzbočyn.

Darožnaje pakryćcio robiać šmatsłojnym: spačatku zdymajuć častku staroha asfaltu, potym układvajuć ščebień, nižni i vierchni płasty asfaltabietonu. Paśla rekanstrukcyi šyrynia darohi składzie kala 12 mietraŭ. Choć pałos ruchu zastaniecca dźvie, prapusknaja zdolnaść i biaśpieka istotna pavialičacca.

Akramia samoha pakryćcia, staviać barjernyja aharodžy, aśviatleńnie, piešachodnyja elemienty, aŭtobusnyja prypynki i sotni darožnych znakaŭ. Taksama pravodzicca ramont mosta praz raku Vydryca.

Usiaho na abjekcie płanujecca vykarystać bolš za miljon ton roznych materyjałaŭ, uklučajučy hrunt i asfalt.

Dla biaśpieki kiroŭcaŭ padčas rabot ruch častkova arhanizavany pa adnoj pałasie sa śviatłaforami. Paśla zaviaršeńnia budaŭnictva naniasuć znosastojkuju raźmietku, u tym liku tak zvanuju «hučnuju» — jana dapamahaje kiroŭcam nie zasnuć za rulom.

Na realizacyju prajekta ŭ hetym hodzie vydzielena kala 90 miljonaŭ rubloŭ. U cełym u Viciebskaj vobłaści płanujuć jašče bolš pavialičyć finansavańnie darožnych rabot i praciahnuć madernizacyju inšych tras.

Kamientary da artykuła