Uviali štrafy dla tych, chto vykidvaje chatnich žyvioł
Raniej možna było atrymać albo kryminalnuju adkaznaść za hibiel žyvioły — albo ničoha.
U Biełarusi ŭvodzicca administracyjnaja adkaznaść za žorstkaje abychodžańnie z žyviołami i, asobna, za ich vykidvańnie. Da hetaha padobnyja dziejańni mahli padpadać tolki pad kryminalny artykuł — i to ŭ vypadkach, kali jany pryvodzili da hibieli abo kalectva žyvioły.
Raniej dziejničaŭ tolki artykuł 339¹ Kryminalnaha kodeksa, jaki praduhledžvaŭ pakarańnie za žorstkaje abychodžańnie z žyviołaj, kali heta pryviało da jaje śmierci abo kalectva. Za heta mahli pryznačyć aryšt abo chimiju da dvuch hadoŭ, a pry paŭtornaści abo hrupavych dziejańniach — da čatyroch hadoŭ chimii ci kałonii.
Ciapier ža ŭ Kodeks ab administracyjnych pravaparušeńniach uvodzicca artykuł 19.14, jaki achoplivaje bolš šyrokaje koła situacyj:
— za žorstkaje abychodžańnie z žyviołaj biez nastupstvaŭ u vyhladzie hibieli abo kalectva praduhledžany štraf da 15 bazavych vieličyń (siońnia bazavaja — 45 rubloŭ).
— za vykidvańnie žyvioły — štraf ad 10 da 30 bazavych vieličyń.
— za žorstkaje abychodžańnie, jakoje vyražajecca ŭ katavańni abo pryviało da hibieli ci kalectva, — štraf ad 20 da 30 bazavych, abo hramadskija raboty, abo aryšt da 15 sutak.
Što takoje «vykidvańnie žyvioły»? Heta faktyčnaje pakidańnie hadavanca, a taksama niepadača zajavy ab źniknieńni zarehistravanaj žyvioły ciaham troch dzion.
Takim čynam, ułady faktyčna zapaŭniajuć pramiežak pamiž adsutnaściu adkaznaści i kryminalnym pieraśledam — i ŭpieršyniu ŭvodziać asobnaje pakarańnie za sam fakt vykidvańnia chatnich žyvioł.
Novaja norma zapracuje praz dva miesiacy.