Łukašenka pavinšavaŭ prezidenta Izraila z Dniom niezaležnaści
«Padziei na Blizkim Uschodzie vyklikajuć zakłapočanaść i bol u našych sercach, ale my spadziajomsia na jak maha chutčejšaje ŭstalavańnie spakoju ŭ rehijonie», — dadaŭ jon.
Fota: Alexander Kazakov, Sputnik, Kremlin Pool Photo via AP
Alaksandr Łukašenka pavinšavaŭ prezidenta Izraila Icchaka Hiercaha z Dniom Niezaležnaści, paviedamlaje pres-słužba.
Jon adznačyŭ, što jaŭrejski narod maje šmatviakovyja tradycyi, u tym liku relihijnyja i adukacyjnyja, jakija i siońnia farmujuć asnovy identyčnaści sučasnaha izrailskaha hramadstva.
«Mienavita na biełaruskaj ziamli dziejničali viadomyja duchoŭnyja centry — ješyvy, — havorycca ŭ vinšavańni. — Vychadcy z našaha kraju stajali la vytokaŭ Dziaržavy Izrail. Usio heta zbližaje abodva narody, jakija prajšli praz ahulnyja ciažkija vyprabavańni Druhuju suśvietnuju vajnu i trahiedyju Chałakost».
Biełarusy dobra viedajuć, što takoje vajna, i tamu paśladoŭna vystupajuć za mirnaje ŭrehulavańnie kanfliktaŭ, padkreśliŭ Alaksandr Łukašenka. «Padziei na Blizkim Uschodzie vyklikajuć zakłapočanaść i bol u našych sercach, ale my spadziajomsia na jak maha chutčejšaje ŭstalavańnie spakoju ŭ rehijonie», — dadaŭ jon.
«Pa miery narmalizacyi situacyi Minsk hatovy pašyrać kantakty i ŭzajemadziejańnie ŭ śfierach adukacyi, miedycyny, technałohij, sielskaj haspadarki i turyzmu, — zapeŭniŭ Łukašenka. — Pierakanany, ahulnaja histaryčnaja spadčyna i ščylnyja čałaviečyja suviazi buduć i nadalej słužyć asnovaj kanstruktyŭnaha dyjałohu pamiž Biełaruśsiu i Izrailem».
Alaksandr Łukašenka pažadaŭ Icchaku Hiercahu mocnaha zdaroŭja i pośpiechaŭ, a žycharam Izraila — ščaślivaha žyćcia i roskvitu.
Čytajcie taksama:
Prezident Arhienciny Milej praśpiavaŭ na kancercie ŭ honar Nietańjachu