Na čempijanacie Jeŭropy biełaruski barec daŭ poŭchu tytułavanamu turku za jaho nachabstva. Heta ledź nie kaštavała našamu miedala

Na čempijanacie Jeŭropy pa baraćbie ŭ ałbanskaj Tyranie adbyŭsia skandał z udziełam biełaruskaha spartsmiena Paŭła Hlinčuka. Biełarusa ledź nie dyskvalifikavali, ale jon u vyniku vyrvaŭ sabie miedal, piša «Trybuna».

Pavieł Hlinčuk — sprava

Pavieł Hlinčuk upeŭniena dajšoŭ da paŭfinału, pieramohšy supiernikaŭ sa Šviecyi i italjanskaha pradstaŭnictva. U paŭfinale jaho supiernikam staŭ vielmi vopytny turecki barec Ryza Kajaałp — 11‑razovy čempijon Jeŭropy i 5‑razovy čempijon śvietu.

Padčas pajadynku, u jakim upeŭniena pieramahaŭ turecki spartsmien, jon dvojčy ŭdaryŭ Hlinčuka dałońniu pa hałavie, što supiarečyć praviłam. Sudździa spyniaŭ pajadynak i rabiŭ zaŭvahi. Ale paśla druhoha takoha epizodu biełarus nie strymaŭsia: šturchnuŭ supiernika i ŭ adkaz taksama ŭdaryŭ jaho.

Padčas pajadynku. Turecki spartsmien u sinim tryko, Pavieł Hlinčuk — u čyrvonym

Paśla hetaha Kajaałp karcinna upaŭ na dyvan, a sudździ paśla abmierkavańnia situacyi dyskvalifikavali Hlinčuka za pavodziny. Jon paśla taho nie padaŭ ruku ni supierniku, ni sudździam.

Spačatku heta aznačała, što biełarus nie zmoža zmahacca za bronzu. Adnak jaho kamanda padała apielacyju, źviarnuŭšy ŭvahu, što kanflikt spravakavaŭ mienavita turecki barec. U vyniku rašeńnie źmiakčyli: dyskvalifikacyja zastałasia tolki za hety pajadynak, ale Hlinčuku dazvolili ŭdzielničać u baraćbie za treciaje miesca.

Uviečary 21 krasavika Pavieł Hlinčuk, jaki na hetych spabornictvach vystupaje ŭ niejtralnym statusie, vyjšaŭ na pajadynak za bronzu suprać inšaha «niejtralnaha» spartsmiena — Marata Kamparava z Rasii. U im jon byŭ macniejšy i zavajavaŭ miedal.

Paŭłu Hlinčuku 24 hady, jon rodam z Dokšyckaha rajona. Dužajecca jon u samaj ciažkaj vahavaj katehoryi.

Kamientary da artykuła