MZS Irana: Sustreča z ZŠA nie płanujecca
Pramyja pieramovy pamiž ZŠA i Iranam apošni raz prachodzili 11—12 krasavika ŭ Pakistanie i skončylisia pravałam.
Abas Arahčy. Fota: AP Photo / Khaled Elfiqi
Iran nie płanuje novy raŭnd pieramovaŭ z ZŠA. Pra heta zajaviŭ pradstaŭnik MZS Isłamskaj Respubliki Esmaił Bahai ŭ sacsietcy X.
«My prybyvajem u Isłamabad, Pakistan, z aficyjnym vizitam. Ministr zamiežnych spraŭ Abas Arahčy sustreniecca z vysokapastaŭlenymi aficyjnymi asobami Pakistana ŭ ramkach ich pastajannaha pasiarednictva i dobrych pasłuh z metaj spynieńnia naviazanaj Amierykaj ahresiŭnaj vajny i adnaŭleńnia miru ŭ našym rehijonie», — napisaŭ Bahai.
Asobna pradstaŭnik MZS padkreśliŭ, što sustrečy pamiž Iranam i ZŠA nie płanujucca: «Pazicyja Irana budzie daviedziena da viedama Pakistana».
Abas Arahčy znachodzicca ź vizitam u Pakistanie dla pieramovaŭ z premjer-ministram Šachbazam Šaryfam, ministram zamiežnych spraŭ krainy Ischakam Daram i načalnikam štaba suchaputnych vojskaŭ Pakistana fieldmaršałam Asimam Muniram.
Śpiecpasłańnik prezidenta ZŠA Styŭ Uitkaf i Džared Kušnier taksama płanujuć pravieści sustreču z pakistanskimi ŭładami.
Pramyja pieramovy pamiž ZŠA i Iranam apošni raz prachodzili 11—12 krasavika ŭ Pakistanie. Tady baki nie zmahli damovicca.