Biełaruskaha futbolnaha treniera Špileŭskaha zvolnili ŭ Rasii — zarobak $850 tysiač na hod, a kamanda na dnie
Vyhnać raniej nie mahli, bo było b zanadta doraha płacić niaŭstojku.
Alaksiej Špileŭski
Alaksieja Špileŭskaha zvolnili z pasta hałoŭnaha treniera kłuba «Pary NN» z rasijskaha Nižniaha Noŭharada.
Pra zvalnieńnie paviedamiŭ insajdar Ivan Karpaŭ.
U kłubie Špileŭski atrymlivaŭ pa 60 tysiač jeŭra na miesiac. Niepasredna zarobak u biełarusa — 57 800 jeŭra, ale jašče 2200 jeŭra jamu płacili na arendu kvatery.
Vyniki ŭ 37‑hadovaha biełarusa byli sumnyja, paraza za parazaj, ale i vyhaniać jaho było doraha. U kantrakcie prapisana, što kali pry ciapierašnich vynikach treniera zvalniajuć da Novaha hoda, to jamu pavinny buduć zapłacić 800 tysiač jeŭra niaŭstojki. Kali paśla Novaha hoda — prykładna 240 tysiač jeŭra.
Paśla chatniaj parazy Spartaku (1:2) za 3 tury da finišu kamanda «Pary NN» z 22 bałami znachodzicca na 15‑m miescy i ryzykuje vylecieć z rasijskaj premjer-lihi.
Alaksiej Špileŭski ŭznačaliŭ «Pary NN» u červieni 2025 hoda paśla taho, jak adtul byŭ zvolnieny inšy biełaruski trenier — Viktar Hančarenka. Pierad hetym Špileŭski try hady ŭznačalvaŭ kiprski kłub «Arys» ź Limasoła, ź jakim dabiŭsia niemałych pośpiechaŭ. Pad jaho kiraŭnictvam «Arys» u 2023 hodzie ŭpieršyniu ŭ historyi staŭ čempijonam Kipra, a paśla prabiŭsia ŭ hrupavy raŭnd Lihi Jeŭropy. U tym ža 2023 hodzie Špileŭski byŭ pryznany najlepšym trenieram čempijanatu Kipra.