«U pracy mnie padabajecca kalektyŭ i ŭ peŭnaj stupieni svaboda». Jak dziaŭčynie-sisadminu pracujecca ŭ rajonnaj balnicy
«Siarod supracoŭnikaŭ jość «staraja škoła», jakaja supraciŭlajecca ŭsim navinkam, u tym liku novym apieracyjnym sistemam».
U 90‑ch i 2000‑ch hadach sistemnyja administratary znachodzilisia na piarednim krai infarmacyjnaj revalucyi. Jany zabiaśpiečvali stabilnuju pracu elektronnych navinak na pradpryjemstvach i ŭ arhanizacyjach, padtrymlivali sierviery i ramantavali pryntary, pryhadvaje Devby.io.
Paralelna jany dapamahali siabram i kaleham razabracca ŭ kampjutarnych asnovach, źbirali kampjutary znajomym i ŭstaloŭvali na ich apieracyjnyja sistemy, miedyjapłejery i antyvirusy, prakładali (časta na hołym entuzijaźmie) ŭražlivyja łakalnyja sietki ŭ šmatkvaternych damach. Być sistemnym administrataram u toj čas było vielmi prestyžna, a mieć sistemnaha administratara siarod siabroŭ było vielmi kruta (i časta zručna).
Ź ciaham času prafiesija sistemnaha administratara značna źmianiłasia, asabliva ŭ IT-kampanijach. Źmianiŭsia kruh zadač: prafiesija evalucyjanavała ad fizičnaha absłuhoŭvańnia «žaleza» i naładki sietak da kiravańnia vobłačnaj infrastrukturaj, aŭtamatyzacyi pracesaŭ i zabieśpiačeńnia kibierbiaśpieki. Paralelna vyrasła i zarpłata vysokakvalifikavanych śpiecyjalistaŭ.
Adnak hetyja źmieny zakranuli nie ŭsich. U škołach, sielskahaspadarčych arhanizacyjach, paliklinikach, VNU, na zavodach i ŭ vykankamach dahetul pracujuć sotni sistemnych administrataraŭ staroj škoły. Jakija, akramia vykanańnia pramych abaviazkaŭ, usio jašče vykonvajuć rolu pasiarednikaŭ pamiž kalehami i śvietam infarmacyjnych technałohij. I zusim nie abaviazkova heta ludzi va ŭzroście.
Adna z takich maładych sistemnych administratarak «staroj škoły» — Palina (imia źmieniena).
— Bolšaja častka pracoŭnaha dnia ŭ mianie idzie na rucinnyja zadačy: raspracoŭku raskładu/hrafika, administravańnie sajta i sacyjalnych sietak, padtrymku prahramnaha zabieśpiačeńnia i, pry nieabchodnaści, pryntaraŭ.
Z 1S mnie pracavać nie davodziłasia. Zatoje jość dośvied pracy sa sastarełymi apieracyjnymi sistemami. Na hety momant u našaj arhanizacyi ich užo praktyčna nie zastałosia, ale niadaŭna ich było dastatkova. Samaja staraja apieracyjnaja sistema, jakuju ja tut zaśpieła, — heta Windows XP. Heta było litaralna hod-dva tamu.
Siarod maich abaviazkaŭ niama funkcyi abnaŭlać apieracyjnyja sistemy. Ale davodzicca zajmacca hetym, jak tolki ŭźnikaje nieabchodnaść. Naprykład, na staruju AS nie ŭstaloŭvajecca niejkaje PZ — i hetuju prablemu treba vyrašać lubymi sposabami. Ciapier amal usio nieabchodnaje prahramnaje zabieśpiačeńnie patrabuje «dziasiatku». Siarod supracoŭnikaŭ jość «staraja škoła», jakaja supraciŭlajecca ŭsim navinkam, u tym liku novym apieracyjnym sistemam. Ale my, sistemnyja administratary, hetyja pytańni nie vyrašajem: źviartajemsia da ich niepasrednaha kiraŭnictva, i ŭžo jano pierakonvaje ich, tłumačyć važnaść źmienaŭ. Uvohule navučańnie ŭsio roŭna kładziecca na našy plečy.
Davoli časta davodzicca sutykacca i ź nielicenzijnym prahramnym zabieśpiačeńniem.
Stresavy dla ŭstanoŭ achovy zdaroŭja pierachod z papiarovych miedycynskich kartak na elektronnyja ŭ našaj balnicy adbyvaŭsia ŭ 2018 hodzie, ja jaho nie zaśpieła. Zatoje zaśpieła rekanstrukcyju palikliniki. Tam byŭ vialiki abjom pracy: ustanoŭka novych PK, pryntaraŭ i inšaha abstalavańnia — i ŭsio ŭ ścisłyja terminy.
Z umovami pracy ŭ pryncypie ŭsio narmalna. Zarobak nievialiki — 1200 rubloŭ (kala $420). Heta, viadoma, u zaležnaści z čym paraŭnoŭvać, ale zaŭsiody chočacca bolšaha.
U pracy mnie padabajecca kalektyŭ i ŭ peŭnaj stupieni svaboda: časam pracy byvaje mienš, čym zvyčajna, i zastajecca volny čas na praciahu pracoŭnaha dnia.
Kaniešnie, kalehi prynosiać svaje asabistyja noŭtbuki, časta źviartajucca pa niepracoŭnych pytańniach. Zvyčajna dapamahaju im. Jakoha-niebudź źnievažalnaha staŭleńnia da mianie jak da niemiedycynskaha supracoŭnika ź ich boku nie pamiataju — usie ŭsprymajuć mianie chutčej jak roŭnuju.
Ja starajusia sačyć za padziejami ŭ «vialikim IT-śviecie». Raźvivałasia ŭ napramku veb-dyzajnu, niejki čas padpracoŭvała dystancyjna, sumiaščajučy ź ciapierašniaj pracaj.