Yung Lean, šviedskaja zorka ź Minska, źniaŭ žorstki klip ź nievierahodna hipnatyčnym tancam. Vam treba heta bačyć!
Šviedski repier Yung Lean źniaŭ niezvyčajny klip na svoj trek «STORM» — karotkamietražnaja antyŭtopija pra padletkavy hvałt, jakaja pieratvarajecca ŭ začaroŭvalny vizualny hipnoz. Hetyja kadry zapałanili sacsietki.
Režysior i chareohraf novaha klipa Yung Lean zdoleli stvaryć nievierahodnaje hipnatyčnaje pa svajoj sile vidovišča, epicentram jakoha staŭ chip-chop-vykanaŭca. Kadr z klipa
Jak my ŭžo pisali raniej, bijahrafija Junatana ščylna źviazanaja ź Biełaruśsiu. U kancy dzievianostych jahonaja maci Elza, jakaja kaliści sama vyrasła ŭ Savieckim Sajuzie ŭ siamji viadomaj šviedskaj žurnalistki, pryjechała pracavać u minskaje pradstaŭnictva Prahramy raźvićcia AAN, zajmajučysia pytańniami pravoŭ čałavieka. Jana ščyra chacieła, kab u syna było dziacinstva, padobnaje da jaje ŭłasnaha, tamu pieršaj movaj budučaha kumira miljonaŭ stała mienavita ruskaja.
Razam ź imi ŭ biełaruskaj stalicy žyŭ i baćka Junatana, šviedski piśmieńnik Krystafier Leandoer, jaki paśpieŭ naładzić vydatnyja suviazi z našymi litaratarami i navat vydaŭ supolny zbornik pierakładaŭ razam z Ryhoram Baradulinym dy Alesiem Razanavym.
Siamja praviała ŭ Minsku try hady, a zvyčajny saviecki dzieviacipaviarchovik na vulicy Pulichava, dzie jany tady kvataravali, pieratvaryŭsia dla fanataŭ muzyki ŭ sapraŭdnaje miesca pałomnictva. Dajšło da taho, što kali dom niadaŭna pieražyŭ kapitalny ramont i straciŭ svoj aŭtentyčny zmročny vyhlad, prychilniki muzyki pačali ładzić u siecivie pratesty suprać źniščeńnia hetaj svojeasablivaj «histaryčnaj spadčyny».
Novy reliz źjaŭlajecca supolnaj pracaj šviedskaha vykanaŭcy i francuzskaha elektronnaha pradziusara Surkin, jaki stvaraje muzyku pad psieŭdanimam GENER8ION. Videaklip, jaki ŭklučaje dźvie častki kampazicyi, pieranosić hledača ŭ niedalokuju budučyniu. Baniery ŭ kadry paviedamlajuć, što na dvare 2034 hod, a dziejańnie razhortvajecca ŭ elitnym brytanskim internacie dla chłopčykaŭ.
U hetaj škole jość tolki padletki: hieroj Chosteda i ŭsie astatnija — jaho achviary. Kadr z klipa
Tut panuje atmaśfiera tryvohi, dzie darosłyja adsutničajuć, a ŭłada naležyć padletkam. Chosted vykonvaje rolu žorstkaha zadziry, jaki trymaje ŭ strachu ŭsiu škołu.
Niahledziačy na toje, što śpievaku ŭžo amal tryccać hadoŭ, jon upisaŭsia ŭ vobraz chulihana-školnika vielmi naturalna, kryšačy vyški 6G, kab pakuryć nieviadomaj pakul šmali, zdabytaj ź jaje, i kałociačy dy prynižajučy svaich łuzieraŭ-adnakašnikaŭ — to bok luboha ŭ hetaj dziŭnaj škole, na kaho kinie svajo niadobraje voka.
Pieršaja pałova klipa poŭnaja padletkavaj ahresii, uvasoblenaj u hieroi Chosteda. Kadr z klipa
Muzyčnyja ahladalniki adnadušna aceńvajuć klip jak ekstraardynarnuju padzieju, adznačajučy, što heta tryvožnaje i žorstkaje adlustravańnie internackaha žyćcia ŭ styli «Uładara much» trymaje hledača ŭ hipnatyčnym napružańni ad pieršaj da apošniaj siekundy. Heta śviet, dzie niama miesca dyjałoham, a ŭsie emocyi pieradajucca praź instynktyŭnyja ruchi i brutalnyja ŭčynki.
Režysioram muzyčnaha klipa vystupiŭ Ramen Haŭras, syn słavutaha režysiora Kosty-Haŭrasa. Ramen raniej užo zdymaŭ klipy dla vykanaŭcaŭ, takich jak M.I.A., Justice i Jamie xx, a taksama poŭnamietražny film «Afina». Haŭras viadomy svaim umieńniem pakazvać masavy chaos i vuličny hvałt tak, što ad hetaha niemahčyma adarvać vačej.
Yung Lean hulaje ŭ svaim klipie rolu hałoŭnaha i adzinaha zadziry ŭ škole. Kadr z klipa
Supracoŭnictva z Haŭrasam — heta važny krok u karjery Chosteda, bo jon usio dalej adychodzić ad vobraza depresiŭnaha kłaŭd-repiera z savieckich dvaroŭ i robić upeŭnieny krok u vialikaje kino. Mienavita Haŭras zaprasiŭ Junatana na jahonuju pieršuju paŭnavartasnuju rolu ŭ filmie «Achviarapranašeńnie» (Sacrifice), dzie šviedski muzyka syhraŭ na adnoj placoŭcy z Aniaj Tejłar-Džoj i Krysam Evansam.
Klip «STORM» vyhladaje jak vizitoŭka Chosteda-akciora, jakaja dakazvaje, što jon zdolny trymać na sabie ŭvahu biez adzinaha vymaŭlenaha ŭ kadry słova.
Pryviedzienyja da adzinaha vyhladu školnaj uniformaj padletki zdolnyja dziejničać jak adziny arhanizm, abo vybuchnuć chaosam i ahresijaj. Kadr z klipa
Sapraŭdnaja mahija pačynajecca ŭ druhoj pałovie videa, kali hučyć trek «STORM II». Napružanaść i hvałt pieršaj častki raptoŭna źmianiajucca ekstatyčny jadnańniem školnikaŭ u tancy na prystupkach trybuny, dzie jany sabralisia jak byccam dla hrupavoha zdymka.
Kadr z klipa
Vybitny chareohraf Damjen Žale stvaryŭ absalutna začaroŭvalnaje vidovišča, u jakim niekalki dziasiatkaŭ chłopcaŭ stvarajuć vakoł nieruchomaha śpievaka z cyharetkaj u zubach zvyšskładany, niaspynna źmienlivy malunak. Hety žyvy arhanizm robicca to chvalistym, to simietryčnym i paternavanym, byccam u kalejdaskopie, kab užo praź imhnieńnie vybuchnuć razam z muzykaj, rassypacca ŭ chaatyčnaje mora rezkich ahresiŭnych ruchaŭ. Śvietłyja tvary, ruki i adnolkavyja biełyja kašuli tancoraŭ virujuć u ciomna-sinim mory strohaj školnaj formy, uvodziačy hledača ŭ trans. Ruchi adtočany da nievierahodnaj sinchronnaści.
Kadr z klipa
Kadr z klipa
Junatan Chosted prajšoŭ doŭhi šlach ad zmročnaha minskaha padjezda i prablem z narkotykami da statusu kultavaj fihury, jakaja pracuje z najlepšymi vizijanierami sučasnaści. I kali raniej jahonaje majsterstva palahała ŭ tranślacyi ŭłasnaj depresii, to ciapier jon dakazvaje, što zdolny być centralnaj fihuraj u mastactvie zusim inšaha ŭzroŭniu.