Ajcišnicy dali try hady pa spravie Hajuna. Jana žyła ŭ Vilni, ale pieryjadyčna jeździła na radzimu

Volha Bułanava šmat hadoŭ pracavała buchhałtarkaj, a paśla źmianiła prafiesiju i vyvučyłasia na UX-dyzajnierku. U mai 2025 hoda jaje aryštavali.

Volha Bułanava. Fota ź jaje staronki Ukantakcie

Volzie Bułanavaj (u dziavoctvie — Viniackaj) 43 hady. Jana z Babrujska. Paśla zakančeńnia miascovaha ahrarna-ekanamičnaha kaledža ŭ 2004 hodzie jana ŭładkavałasia apieratarkaj PEVM na Babrujskuju abutkovuju fabryku.

Nieŭzabavie pajechała vučycca ŭ Minsk. Volha z 2005 hoda pracavała mieniedžarkaj u kampanii «Braš Majstar». I paralelna atrymlivała vyšejšuju adukacyju na ŭlikova-ekanamičnym fakultecie Biełaruskaha dziaržaŭnaha ekanamičnaha ŭniviersiteta.

U 2006 hodzie Volha pryjšła ŭ kampaniju «Łonza». Tam jana adpracavała bolš za 11 hadoŭ, darosšy da pasady namieśnicy hałoŭnaha buchhałtara. Paralelna z hetym, u 2009—2010 hadach, taksama pracavała hałoŭnaj buchhałtarkaj u inšaj firmie.

Addaŭšy finansam bolš za 10 hadoŭ, Bułanava vyrašyła kardynalna źmianić žyćcio. U 2018—2019 hadach jana prajšła navučańnie ŭ IT Academy i atrymała prafiesiju UI/UX-dyzajnierki. Paśla znajšła pracu ŭ IT.

Volha Bułanava. Fota ź jaje staronki Ukantakcie

Kali mierkavać pa sacsietkach, jana da samaha zatrymańnia žyła ŭ Litvie, ale raz na paru miesiacaŭ jeździła ŭ Biełaruś. U žančyny jość muž i dzicia.

Volhu aryštavali 21 maja 2025 hoda i źmiaścili ŭ SIZA. Jaje asudzili ŭ Minskim haradskim sudzie pavodle častak 1 i 2 artykuła 361‑4 KK. Pa źviestkach Dissidentby, pieraśled źviazany sa spravaj Hajuna.

3 studzienia 2026 hoda Volzie prysudzili try hady kałonii.

Kamientary da artykuła