Koŭł: Łukašenka choča, kab Biełaruś stała častkaj jeŭrapiejskaj siamji narodaŭ
Śpiecyjalny pasłańnik prezidenta ZŠA pa Biełarusi Džon Koŭł zajaviŭ ahienctvu Reuters, što ciapier abmiarkoŭvajecca mahčymy vizit Alaksandra Łukašenki ŭ Złučanyja Štaty. Pavodle jaho słoŭ, takaja pajezdka mahła b stać dobrym krokam dla raźvićcia adnosin pamiž krainami.
Alaksandr Łukašenka. Fota: Evgenia Novozhenina / Pool Photo via AP
Koŭł skazaŭ, što ciapier abmiarkoŭvajecca tema adkryćcia ambasady ZŠA ŭ Minsku. Jon adznačyŭ, što ŭsie hetyja pytańni znachodziacca na paradku dnia, i vykazaŭ aptymizm adnosna ich realizacyi.
Na dumku amierykanskaha pradstaŭnika, Łukašenka choča, kab Biełaruś stała častkaj jeŭrapiejskaj siamji narodaŭ. Jak jon ličyć, vyzvaleńnie palitviaźniaŭ mahło b dapamahčy Minsku ruchacca ŭ hetym kirunku.
«Pakul my daviarajem adzin adnamu, i… kali adzin adčuvaje, što druhi źbiŭsia z kursu, my heta naładzim», — akreśliŭ Koŭł svaje asabistyja adnosiny z Łukašenkam.
Taksama Koŭł paviedamiŭ, što płanuje pryjechać u Biełaruś praz dva-try tydni i spadziajecca, što ciaham miesiaca ŭdasca damahčysia vyzvaleńnia častki palitviaźniaŭ.
Padčas papiaredniaj sustrečy z Koŭłam 19 sakavika Łukašenka kazaŭ, što Donald Tramp nibyta zaprasiŭ jaho ŭ svaju rezidencyju ŭ Fłarydzie dla abmierkavańnia «vialikaj ździełki».