Paśla skarhi stukača z papularnych biełaruskich sajtaŭ źnikli ceny ŭ dalarach na mašyny i kvatery
U krasaviku niekalki papularnych biełaruskich sajtaŭ z abjavami całkam prybrali ceny ŭ dalarach. Ciapier treba pryvykać, što mašyna kaštuje 75 tysiač rubloŭ, a kvatera, naprykład, 300 tysiač. Voś u čym sprava.
Ilustracyjny zdymak. Fota: «Naša Niva»
Tak, z 23 krasavika ceny ŭ dalarach źnikli na samaj papularnaj placoŭcy pa prodažy aŭto ŭ Biełarusi — av.by. Administracyja sajta patłumačyła heta rekamiendacyjaj, atrymanaj z boku Ministerstva antymanapolnaha rehulavańnia i handlu.
Praz dva dni anałahičnyja źmieny ŭviali i na sajcie abw.by, taksama spasłaŭšysia na rekamiendacyi ad MARH.
Skrynšot: av.by
Aŭdytoryi, miarkujučy pa kamientaryjach u sacsietkach i na sajcie abw.by, padobnyja novaŭviadzieńni niedaspadoby.
«Da hetaha niemahčyma pryvyknuć», — piša čałaviek u treds pad navinoj av.by pra admovu ad dalaraŭ u abjavach.
«I jak ciapier zrazumieć, što kolki kaštuje?» — zadajecca pytańniem inšy kamientatar.
«Dyk zrabicie hałoŭnymi BYN i krychu mienšym pakazvajcie ŭ pamiery USD», — raić inšy. Praŭda, mienavita taki varyjant, dzie vialikim i tłustym šryftam była ŭkazana cana ŭ rublach, a nižej u dalarach, užo daŭno byŭ na sajcie. I mienavita z hetym stali zmahacca čynoŭniki.
Pa takoj schiemaj — asnoŭnaja cana ŭ biełaruskich rublach, a daviedkavaja ŭ dalarach — sajty pracavali apošnija dziesiać hadoŭ. Tady Minhandlu pakazalna zabłakavała «Anłajnier», dzie ceny ŭkazvalisia ŭ dalarach. Ułaśnikam biznesaŭ daviałosia pajści na sastupki. Ciapier ža ad ich patrabujuć całkam schavać canu ŭ zamiežnaj valucie.
Tak adlustroŭvałasia cana da apošnich novaŭviadzieńniaŭ. Skrynšot: av.by
Pad navinoj na sajcie abw.by bolšaść kamientataraŭ taksama krytykujuć admovu ad dublavańnia cany ŭ valucie.
Skrynšot: abw.by
«Vielmi niazručna», — piša adzin.
«Usio roŭna pieravodziać usio ŭ dalary. Ja ŭpeŭnieny na 10000%. Prosta zrabili łuchtu dla ludziej. Karaciej, tolki kab horš było», — dadaje inšy.
A redkija kamientary ŭ padtrymku nabirajuć šmat dyzłajkaŭ.
Čamu MARH pajšoŭ na taki krok?
Pavodle MARH, da padobnaha rašeńnia ich nibyta padšturchnuŭ zvarot niejkaha hramadzianina, jaki paskardziŭsia, što košt nieruchomaści na sajtach paznačajuć u zamiežnaj valucie.
U suviazi z hetym čynoŭniki ŭžo vydali 18 rekamiendacyj internet-resursam, jakija rekłamujuć turystyčnyja pasłuhi, nieruchomaść, aŭtamabili i inšyja tavary z ukazańniem cen u zamiežnaj valucie, prybrać dalary.
Biełarusy ž, pa ŭsioj bačnaści, admaŭlacca ad dalaraŭ pry kupli-prodažy aŭto nie hatovyja, tamu ŭžo navat paśpieli raspracavać pašyreńnie dla av.by u Google Chrome, jakoje budzie kanviertavać ceny zhodna z kursam Nacbanka.
Pry hetym pry ŭstaloŭcy padobnych dadatkaŭ varta być pilnymi: takija pašyreńni mohuć rabić i raspaŭsiudžvać u tym liku machlary.
Čamu biełarusam važnyja ceny ŭ dalarach?
Niahledziačy na toje, što apošnija hady biełaruski rubiel adnosna stabilny, u biełarusaŭ za dziesiacihodździ skłałasia zvyčka ŭsie bujnyja pakupki ličyć u dalarach.
A ŭ vypadku ź impartnymi tavarami, u tym liku aŭtamabilami, taki padychod naohuł vyhladaje łahičnym, pakolki, aproč ajčynnych Geely/Belgee, jakija majuć fiksavanuju canu ŭ rublach, astatnija aŭto impartujuć ź inšych krain.
Kali havorka idzie pra impart z trecich krain, to mašynu treba razmytnić, i mytnyja staŭki prapisany ŭ jeŭra, a nie ŭ biełaruskich rublach.