Dalar na minimałkach. Čamu nasupierak prahnozam ekanamistaŭ rubiel nie padaje, a ŭmacoŭvajecca?
Dalar trymajecca kala 2,8 rubla.
Ilustracyjnaje fota: Lookby.media
Pa vynikach tarhoŭ 6 maja 2026 hoda adzin dalar kaštuje 2,825 biełaruskaha rubla. A 24 krasavika jon naohuł apuskaŭsia da 2,804. Dla paraŭnańnia — siaredniehadavy kurs 2025 hoda byŭ 3,06 rubla za dalar.
Pry hetym, Jeŭrazijski bank raźvićcia prahnazavaŭ na sioleta siaredniehadavy kurs 3,32 rubla.
Ekśpiert BEROC Źmicier Kruk nazyvaje dźvie asnoŭnyja hrupy čyńnikaŭ, čamu nasupierak prahnozam biełaruski rubiel nie tańnieje, a naadvarot, umacoŭvajecca.
Pieršaja pryčyna: prodaž valuty nasielnictvam
«Kali hladzieć na naš valutny rynak, to na im nazirajecca peŭny praficyt, jaki ŭtvarajecca pieravažna za košt fizičnych asob», — tłumačyć ekśpiert.
Nasielnictva Biełarusi ŭžo praciahły pieryjad zastajecca čystymi pradaŭcami valuty.
Na heta, na dumku ekanamista, upłyvaje jak prodaž raniejšych źbieražeńniaŭ (u tym liku dla kupli nieruchomaści), tak i pieranakiravańnie nazapašvańniaŭ z valuty ŭ rublovyja depazity, pakolki tam prapanujuć vysokija pracenty.
Ilustracyjny zdymak. Fota: «Naša Niva»
Značna ŭpłyvaje taksama prodaž valuty biełarusami, jakija pracujuć za miažoj. Pierš za ŭsio dalnabojščykami.
Nasielnictva stabilna zdaje nastolki šmat valuty, što hetyja abjomy pierakryvajuć patreby jurydyčnych asob u valucie.
Druhaja pryčyna: rasijski ŭpłyŭ
Druhi nabor čyńnikaŭ, jaki ŭpłyvaje na kurs biełaruskaha rubla, tradycyjna źviazany z rublom rasijskim.
«Hałoŭnuju rolu ŭsio ž adyhryvaje kurs rasijskaha rubla. Kab utrymlivać peŭnuju raŭnavahu, Biełarusi važna padtrymlivać jaje adnosna kursu rasijskaha rubla. Pačynajučy z 2025 hoda takaja tendencyja zachoŭvajecca, i my navat bačym nievialikaje abiesceńvańnie [biełaruskaha rubla da rasijskaha].
Adpaviedna, uzmacnieńnie našaha rubla da dalara — heta chutčej rasijskaja historyja», — adznačaje Kruk.
Rasijski rubiel uzmacniajecca praz peŭnuju adaptacyju rasijskaj ekanomiki da novych umoŭ, jakaja pačała naziracca z kanca 2024 — pačatku 2025 hoda.
«U 2023—2024 hadach u RF była sistemnaja prablema ŭ tym, što šmat valutnaj vyručki nie dachodziła da Rasii. I heta pryvodziła da niedachopu prapanovy i rezkich usploskaŭ popytu, tamu adpaviedna adbyvalisia značnyja vahańni kursa rasijskaha rubla.
Paźniej, da kanca 2024 — pačatku 2025 hoda, u tym liku dziakujučy administracyjnym zachadam, nadyšło razumieńnie, jak pracavać u novych umovach. Plus da hetaha ŭ Rasii byli vielmi vysokija staŭki, jakija ciapier pastupova źnižajucca», — tłumačyć ekśpiert.
Ilustracyjny zdymak. Fota: Dmitry Lovetsky/AP
Čamu prahnozy nie spracavali?
Prahnozy pa kursie biełaruskaha rubla da dalara davalisia z ahladkaj na rasijski rubiel. Ekśpierty ličyli, što raŭnavažny kurs — 90—95 rasijskich rubloŭ za dalar. Ale heta chutčej było aktualna dla pačatku 2025 hoda, ličyć Kruk. Ciapier raŭnavažnymi ličbami nazyvajuć 80—85 rasijskich rubloŭ za dalar.
Pry hetym za krasavik rasijski rubiel naohuł umacavaŭsia z 80 da 75 za dalar.
A voś padaražeńnie rasijskaj nafty na fonie błakiroŭki Armuzskaha pralivu jašče nie paśpieła adbicca na kursie. Upłyŭ hetaha faktara budzie adčuvalny nie raniej, čym praz 1‑2 miesiacy, miarkuje Kruk.