Pamiatajecie ŭkrainskaha skandalnaha palityka Aleha Laško? Voś dzie jon ciapier

Eks-deputata Viarchoŭnaj rady Ukrainy Aleha Laško pryznačyli kamandziram 432‑ha asobnaha pałka bieśpiłotnych sistem 11‑ha armiejskaha korpusa «Uschod», paviedamili infarmavanyja surazmoŭcy «Ukrainskaj praŭdy» va Uzbrojenych siłach Ukrainy.

Aleh Laško. Fota z sacsietak

Pa słovach krynicy vydańnia, 6 maja 2026 hoda rašeńniem kamandavańnia Suchaputnych vojskaŭ USU staršaha lejtenanta Aleha Laško vyzvalili z pasady kamandzira bataljona bieśpiłotnych sistem 63‑j asobnaj miechanizavanaj bryhady 3‑ha armiejskaha korpusa apieratyŭnaha kamandavańnia «Uschod» sa štatna-pasadnaj katehoryjaj «padpałkoŭnik».

Adnačasova Laško pryznačyli kamandziram 432‑ha asobnaha pałka bieśpiłotnych sistem 11‑ha armiejskaha korpusa apieratyŭnaha kamandavańnia «Uschod» sa štatna-pasadnaj katehoryjaj «pałkoŭnik». Adnak pra atrymańnie Laško vajskovaha zvańnia pałkoŭnika havorka nie idzie.

Pierad hetym u kancy krasavika 2026 hoda ŭ ŚMI źjaviłasia infarmacyja, što bataljon bieśpiłotnych sistem 63‑j asobnaj miechanizavanaj bryhady, jaki ŭznačalvaje Laško, budzie pašyrany da pałka.

Aleh Laško — adzin z samych epatažnych palitykaŭ sučasnaj Ukrainy, były lidar Radykalnaj partyi i deputat Viarchoŭnaj Rady niekalkich sklikańniaŭ. Jak palityčnaja fihura jon stvaraŭ sabie vobraz «čałavieka z naroda», jaki zmahajecca suprać aliharchaŭ i elit. Laško zapomniŭsia vybarščykam svaimi ekscentryčnymi vychadkami: jon prychodziŭ u Viarchoŭnuju Radu ź viłami (jakija stali simvałam jaho partyi), jeŭ ziamlu na trybunie i časta ŭstupaŭ u žorstkija vierbalnyja (a časam i fizičnyja) sutyčki z apanientami.

Acenki Laško jak palityka davoli supiarečlivyja. Z adnaho boku, jaho zaŭsiody krytykavali za papulizm i radykalnuju rytoryku, ale ź inšaha — adznačali jaho vialikuju charyzmu i ŭmieńnie pracavać z elektaratam u hłybincy. Praŭda, na apošnich parłamienckich vybarach, jakija adbylisia ŭ červieni 2019 hoda, heta ŭsio jamu nie dapamahło: Radykalnaja partyja Aleha Laško nabrała na ich tolki kala 4% hałasoŭ i ŭ Viarchoŭnuju radu nie trapiła.

Paśla pačatku poŭnamaštabnaha rasijskaha ŭvarvańnia ŭ 2022 hodzie Laško adyšoŭ ad aktyŭnaj publičnaj palityki i dałučyŭsia da šerahaŭ Uzbrojenych sił Ukrainy, dzie prachodzić słužbu. 11 kastryčnika 2024 hoda jaho pryznačyli kamandziram bataljona bieśpiłotnych sistem kiravańnia asobnaj miechanizavanaj bryhady.

Kamientary da artykuła