U abłasnych haradach Biełarusi prarasijskija aktyvisty praviali «Bieśśmiarotnyja pałki»
Prarasijskim aktyvistam udałosia dałučyć šeście «Bieśśmiarotny połk» da aficyjnaj akcyi «Biełaruś pamiataje» ŭ abłasnych haradach Biełarusi. Pra heta paviedamili rasijskaje pasolstva ŭ Biełarusi i pradstaŭnictvy «Rassupracoŭnictva». Pry hetym biełaruskija dziaržaŭnyja miedyja pra «Bieśśmiarotny połk» amal nie zhadvali, piša Reform.news.
«Bieśśmiarotny połk» u Hrodnie
U Hrodnie abjadnanuju kałonu ŭznačalili pradstaŭniki rasijskaha hienkonsulstva i «Ruskaha doma». Pavodle arhanizataraŭ, u šeści ŭdzielničała šmat ludziej z partretami svaich rodnych, jakija vajavali ŭ Druhoj suśvietnaj vajnie. Padčas šeścia hučali viadomyja vajennyja pieśni, jakija ŭdzielniki śpiavali razam.
«Bieśśmiarotny połk» u Hrodnie
U Viciebsku ŭ akcyi, što prajšła ŭ miežach «Biełaruś pamiataje», udzielničali supracoŭniki rasijskaha pasolstva.
«Bieśśmiarotny połk» u Viciebsku 9 maja 2026 hoda. Fota: t.me/RusEmbassyMinsk
Pra padobnaje šeście paviedamili taksama ŭ Breście, dzie razam išli ŭdzielniki dźviuch akcyj, pradstaŭniki delehacyj i žychary horada.
«Bieśśmiarotny połk» u Breście
U Mahilovie, pavodle rasijskaha pasolstva, u mierapryjemstvie ŭdzielničali nie tolki miascovyja žychary, ale i hości z Maskvy.
U Homieli ŭ šeści «Bieśśmiarotnaha pałka» ŭdzielničali supracoŭniki rasijskaha pasolstva i «Ruskaha doma». Arhanizatary padkreślivali, što akcyja simvalizuje pamiać pra pieramohu i pierajemnaść pakaleńniaŭ.
«Bieśśmiarotny połk» u Homieli
Miarkujučy pa fota i videa z padziej, nidzie hetyja akcyi nie byli asabliva šmatlikija.
Sputnik Biełaruś taksama apublikavaŭ videa ź Minska, dzie ŭdzielniki akcyi raskazvali pra svaich svajakoŭ, što ŭdzielničali ŭ vajnie. U kadry byli ludzi z partretami rodnych i Iosifa Stalina.
Raniej prarasijski aktyvist Andrej Hieraščanka zaklikaŭ biełaruskija ŭłady aficyjna ŭklučyć «Bieśśmiarotny połk» u akcyju «Biełaruś pamiataje». Jon śćviardžaŭ, što heta pavinna padkreślić adzinstva Biełarusi i Rasii ŭ śviatkavańni Dnia Pieramohi. Pavodle jaho, taki farmat užo vykarystoŭvaŭsia ŭ 2024 i 2025 hadach.
Razam z tym niadaŭna stała viadoma, što Minharvykankam nie dazvoliŭ praviadzieńnie asobnaha šeścia «Bieśśmiarotnaha pałka» ŭ Minsku 9 maja.
Čytajcie taksama:
U Minsku nie dazvolili pravieści šeście «Bieśśmiarotnaha pałka»
U anieksavanym Krymie admovilisia ad praviadzieńnia parada na 9 maja i akcyi «Bieśśmiarotny połk»