«Ja ŭ Minsku i nie źjedu»: Viačasłaŭ Inaziemcaŭ asprečyŭ čutki pra svoj adjezd ź Biełarusi i zakryćcio teatra «InŽest»
Šmathadovy kiraŭnik płastyčnaha teatra «InŽest» Viačasłaŭ Inaziemcaŭ nazvaŭ źviestki pra svoj adjezd z krainy i zakryćcio teatra fejkami, piša Reform.news.
Viačasłaŭ Inaziemcaŭ u Japonii. Fota: sacsietki tvorcy
Artyst viarnuŭsia ŭ Biełaruś z padarožža ŭ Japoniju, dzie adbylisia jaho vystupy i majstar-kłasy.
«Učora zakončyłasia maja trochtydniovaja japonskaja vandroŭka, — napisaŭ tvorca ŭ sacsietkach. — Dziakuj usim, chto dapamoh hetamu ažyćciavicca. Na kont niadaŭnich fejkaŭ: 1. Ja ŭ Minsku, nie źjechaŭ i nie źjedu. 2. Čutki pra skon teatra «InŽest» mocna pierabolšanyja! U pryncypie nielha zakryć toje, što nikoli nie adkryvałasia. «InŽest» žyvy i zdarovy pakul žyvyja-zdarovyja jaho režysior i aktory».
Nahadajem, što 11 maja «Jeŭraradyjo» paviedamiła pra spynieńnie dziejnaści ŭ Minsku ŭnikalnaj teatralnaj inicyjatyvy sa spasyłkaj na krynicu. «Teatr, na žal, aficyjna bolš nie isnuje. U krasaviku kančatkova vyvieźli dekaracyi», — raskazaŭ vydańniu adzin ź jaho ŭdzielnikaŭ. Paviedamlałasia, što Viačasłaŭ Inaziemcaŭ žyvie ŭ Japonii.