U ZŠA aŭtarku dziciačaj knihi pra pieraadoleńnie hora prysudzili da pažyćciovaha terminu za zabojstva muža
U sudzie byli začytany zajavy jaje synoŭ, jakija kažuć, što bajacca svajoj maci.
Skrynšot videa AP
Sud prysudziŭ Kiry Ryčyns, aŭtarku dziciačaj knihi ab pieraadoleńni hora sa štata Juta, da pažyćciovaha terminu biez prava na ŭmoŭna-daterminovaje vyzvaleńnie za zabojstva muža — baćki jaje dziaciej. U sudzie byli začytany zajavy jaje synoŭ, jakija kažuć, što bajacca svajoj maci. Ryčyns nastojvaje na svajoj nievinavataści i płanuje asprečvać rašeńnie suda, piša Bi-bi-si.
Abviaščajučy prysud, sudździa Ryčard Mrazik skazaŭ, što Ryčyns «zanadta niebiaśpiečnaja, kab kali-niebudź być na voli». Vyniasieńnie prysudu pryjšłosia na dzień naradžeńnia jaje muža Eryka — u sieradu 13 maja jamu spoŭniłasia b 44 hady.
Što kazali ŭ sudzie členy siamji
U sudzie vystupiŭ śviokar žančyny Judžyn Ryčyns. Jon prasiŭ sudździu prysudzić jaje da pažyćciovaha terminu, kab abaranić jaje dziaciej, pieradaje Associated Press. «Hety prysud vielmi važny, kab trom synam Eryka nikoli nie davodziłasia žyć u strachu, što čałaviek, adkazny za śmierć ich baćki, moža naškodzić i im», — skazaŭ jon.
Dzieciam Ryčynsaŭ na momant hibieli Eryka było 9, 7 i 5 hadoŭ. Zaraz jany — pad apiekaj jaho siastry Keci Ryčyns-Bensan. Jana zajaviła, što chłopčyki — «nie dekaracyi dla niejkaj dziciačaj knihi pra hora i stratu, ale mienavita da hetaj roli Kury źviała ich žyćcio».
Sacyjalnyja rabotniki začytali ŭ sudzie listy synoŭ Ryčyns. «Ty zabrała ŭ mianie tatu vyklučna z prahnaści, i tabie było naplavać na ŭsich, akramia samoj siabie i tvaich durnych bojfrendaŭ», — napisaŭ jaje siaredni syn (zaraz jamu 11 hadoŭ). Chłopčyk vymušany byŭ kłapacicca ab svaim małodšym bracie, bo mama nie zajmałasia imi.
Starejšy syn (zaraz jamu 13 hadoŭ) taksama raskazaŭ, što jamu davodziłasia kłapacicca ab bratach. Pa jaho słovach, maci čaściakom zamykała jaho ŭ pakoi, kali piła ałkahol.
Ryčyns, jakaja admoviłasia davać pakazańni padčas sudovaha razboru, pierad vyniasieńniem prysudu vystupiła z 30‑chvilinnaj zajavaj, źviernutaj da svaich synoŭ.
«Jak by mocna vas nie prymušali dumać, što vaš tata byŭ zabity, što ja zabrała jaho ŭ vas, heta zusim nie tak. Poŭnaja chłuśnia», — pryvodzić CNN słovy Ryčyns.
«Ja viedaju, što siońnia vy nie chočacie razmaŭlać sa mnoj i nienavidzicie mianie. Heta narmalna. Kali vy budziecie hatovyja, ja budu pobač», — skazała jana.
Abarona prasiła prysudzić Ryčyns da bolš miakkaha terminu, arhumientujučy heta tym, što ŭ budučyni jaje dzieci mohuć zachacieć adnosin sa svajoj maci. Blizkija Kury Ryčyns taksama prasili ab mienš surovym pakarańni: niekatoryja ź ich, naprykład jaje brat Roni Darden, nastojvali na jaje nievinavataści.
Advakaty Ryčyns majuć namier abskardzić prysud.
Pa viersii śledstva, 36‑hadovaja ahient pa nieruchomaści Kury Ryčyns mieła daŭhi na miljony dalaraŭ i płanavała žyćcio ź inšym mužčynam. Jana zaklučyła niekalki dahavoraŭ ab strachavańni žyćcia svajho muža (jon sam pra heta nie viedaŭ) i pamyłkova ličyła, što atrymaje bolš za $4 młn u spadčynu paśla jaho śmierci.
Eryk Ryčyns pamior 4 sakavika 2022 hoda, vypiŭšy pryhatavany žonkaj kaktejl. Pryčynaj śmierci akazałasia pieradaziroŭka fientaniłam. Praz hod Kury Ryčyns vypuściła dziciačuju knihu «Ty sa mnoj?» ab chłopčyku, čyj baćka pamior, a 8 maja 2023 hoda palicyja zatrymała jaje pa padazreńni ŭ zabojstvie muža.
Ryčyns admoviłasia davać pakazańni ŭ sudzie, a jaje abarona nie stała zvać śviedak. Advakaty žančyny kazali, što jany pierakananyja ŭ tym, što abvinavačańnie nie padało dastatkova dokazaŭ. Abarona Ryčyns nastojvała, što jaje muž byŭ zaležny ad abiazbolvalnych, ale kali Eryk pamior, jana skazała palicyjantam, što jon nie zaŭvažany va ŭžyvańni narkotykaŭ.
U sakaviku 2026 sud prysiažnych pryznaŭ Kury Ryčyns vinavataj pa ŭsich punktach: zabojstva, zamach na zabojstva (jana sprabavała atrucić svajho muža 14 lutaha 2022 hoda, ale jon vyžyŭ) i machlarstva. Jaje čakaje asobny sud pa inšych finansavych abvinavačvańniach.