Dokazaŭ hienacydu ŭ Hazie vyjaŭlena nie było — hałoŭny prakuror Mižnarodnaha kryminalnaha suda
Dla takich vysnoŭ nieabchodnaja kankretnaja dokaznaja baza, i na dadzieny momant Karym Chan jaje nie bačyć.
Fota: Omar Ashtawy/Getty Images
Hałoŭny prakuror Mižnarodnaha kryminalnaha suda Karym Chan zaraz nie bačyć dastatkovych dokazaŭ hienacydu z boku Izraila ŭ siektary Haza. Pra heta jon zajaviŭ u intervju, piša Bild.
Raniej Chan zapytaŭ ordary na aryšt premjer-ministra Izraila Bińjamina Nietańjachu i byłoha ministra abarony Jova Hałanta pa padazreńni ŭ vajennych złačynstvach i złačynstvach suprać čałaviečnaści, adnak ad abvinavačańniaŭ u hienacydzie jon śviadoma admoviŭsia.
U razmovie z brytanska-amierykanskim žurnalistam Miechdzi Chasanam Chan rastłumačyŭ svajo rašeńnie. Jon padkreśliŭ, što prakurory nie pavinny dziejničać pad upłyvam palityčnych łozunhaŭ abo hramadskaha cisku, a abaviazany abapiracca vyklučna na dokazy.
Chasan źviarnuŭ uvahu na toje, što mnohija ekśpierty, a taksama jaho papiarednik Łuis Marena Akampa ŭžo nazyvajuć dziejańni Izraila ŭ vajnie hienacydam. Adnak Chan daŭ zrazumieć, što MKS dla takich vysnoŭ nieabchodnaja kankretnaja dokaznaja baza — i na dadzieny momant jon jaje nie bačyć.
«Prakuror, jaki dziejničaje tolki pad ciskam hramadskaj dumki, byŭ by biezrazvažnym prakuroram. Rašeńni prymajucca na asnovie dokazaŭ, — skazaŭ jon i dadaŭ. — Rasśledavańnie nie zavieršana. Jano praciahvajecca».
Prakuror taksama spasłaŭsia na spravu suprać Pucina: jon paraŭnaŭ heta ź dziejańniami suda ŭ dačynieńni da Rasii ŭ suviazi z vajnoj va Ukrainie. Pavodle słoŭ Chana, mižnarodny sud «spačatku zapytaŭ ordary na aryšt pa spravie ab departacyi ŭkrainskich dziaciej, a paźniej inicyjavaŭ dadatkovyja razbory, źviazanyja z atakami na hramadzianskuju infrastrukturu».
Chan ličyć, što anałahičnym čynam moža raźvivacca i rasśledavańnie pa Hazie. Pry hetym u intervju jon padkreśliŭ maštab pakut hramadzianskaha nasielnictva i zajaviŭ, što jaho viedamstva praciahvaje pracu nad rasśledavańniem.